பேரறிவாளன், முருகன், சாந்தனுக்கு செப்டம்பர் 2ம் தேதிக்குள் தூக்கு

by **நேசமுடன் ஹாசிம்** Sat 27 Aug 2011 - 8:05

ராஜீவ் காந்தி கொலை வழக்கில் தூக்குத் தண்டனை உறுதி செய்யப்பட்ட பேரறிவாளன், முருகன், சாந்தன் ஆகியோரது கருணை மனுக்கள் நிராகரிக்கப்பட்ட தகவலை வேலூர் சிறைக் கண்காணிப்பாளருக்கு மத்திய உள்துறை அமைச்சகம் தெரிவித்து கடிதம் அனுப்பியுள்ளது. இதையடுத்து மூவரையும் தூக்கிலிடுவதற்கான நடவடிக்கைகளை சிறை நிர்வாகம் தொடங்கியுள்ளது.

ராஜீவ் காந்தி கொலை வழக்கில் தூக்குத் தண்டனை விதிக்கப்பட்ட பேரறிவாளன், முருகன் மற்றும் சாந்தன் ஆகியோர் கருணை மனு தாக்கல் செய்திருந்தனர். இந்த மனுவை குடியரசுத் தலைவர் சமீபத்தில் நிராகரித்து உத்தரவிட்டார். இதனால் உலகம் முழுவதும் உள்ள தமிழர்கள் பெரும் அதிர்ச்சிக்குள்ளானார்கள். மூவரையும் தூக்கிலிடக் கூடாது என்று கோரி பல்வேறு நாடுகளிலும், தமிழகத்திலும் போராட்டங்கள் நடந்து வருகின்றன. ஒரு இயக்கம் போல இதை நடத்தி வருகின்றனர்.

இந்தநிலையில் இவர்கள் மூவரின் கருணை மனுக்களை குடியரசுத் தலைவர் நிராகரித்துள்ள தகவலை முறைப்படி உள்துறை அமைச்சகம், வேலூர் சிறைக்கு அனுப்பி வைத்துள்ளது. இதனால் மூவரையும் தூக்கிலிடுவதற்கான நடவடிக்கைகள் தொடங்கியுள்ளன. விதிமுறைப்படி, தூக்குத் தண்டனையை நிறைவேற்றலாம் என்ற உத்தரவு வந்த 7 நாட்களுக்குள் தண்டனைக்குரியவரை தூக்கிலிட வேண்டும். மூன்று தமிழர் விவகாரத்தில், நேற்று கடிதம் வந்ததாக கூறப்படுகிறது. எனவே இன்றிலிருந்து ஏழு நாட்களுக்குள் அதாவது செப்டம்பர் 2ம் தேதிக்குள் அவர்கள் தூக்கிலிடப்படுவார்கள் என்று தெரிகிறது. முதல் கட்டமாக பேரறிவாளன், சாந்தன், முருகன் ஆகிய மூன்று பேரிடமும் கருணை மனு நிராகரிக்கப்பட்ட தகவலை முறைப்படி சிறை அதிகாரிகள் தெரிவித்துள்ளனர். அதன் பின்னர் தற்போது வேலூர் சிறையில் பாதுகாப்பு அதிகரிக்கப்படுகிறது. கமாண்டோப் படையினர் அங்கு குவிக்கப்படுகின்றனர்.

கடந்த 21 ஆண்டுகளாக சிறையில் வாடி வரும் மூவரையும் தூக்கிலிட மத்திய அரசு நாள் குறித்துள்ளது தமிழ் உணர்வாளர்களை பெரும் அதிர்ச்சியில் ஆழ்த்தியுள்ளது. தூக்குத் தண்டனை நிறைவேற்றப்படவுளள்ள மூவரில் பேரறிவாளன் தமிழகத்தைச் சேர்ந்தவர். மற்ற இருவரும் ஈழத்தைச் சேர்ந்தவர்கள்.

இந்நிலையில் மூவரின் தண்டனையையும் நிறுத்தக் கோரி சென்னை உயர் நீதிமன்றத்தில் இன்று வழக்கு தொடரப்படவுள்ளதாக தெரிகிறது. பிரபல வழக்கறிஞர் ராம்ஜேத்மலானி இந்த வழக்கில் ஆஜராகவுள்ளதாகவும் கூறப்படுகிறது. இதற்கான முயற்சிகளை நாம் தமிழர் கட்சி எடுத்துள்ளதாக கூறப்படுகிறது. மூன்று பேரையும் தூக்கிலிட கிட்டத்தட்ட நாள் குறிக்கப்பட்டு விட்டதால், தமிழ் உணர்வாளர்கள் குறிப்பாக நாம் தமிழர் இயக்கத்தினர், பழ.நெடுமாறனின் அமைப்பு, மதிமுக பொதுச் செயலாளர் வைகோ உள்ளிட்டோர் பெரும் அதிர்ச்சி அடைந்துள்ளனர். அனைவரும் மூவரின் விடுதலைக்காக கடுமையாக போராடி வருகின்றனர் என்பது குறிப்பிடத்தக்கது.

இந்த நிலையில் தற்போது தூக்குக் கயிறு மிகவும் நெருங்கி வந்து விட்டதால் மூன்று தமிழர்களையும் எப்படிக் காப்பது என்ற ஆலோசனையில் தலைவர்கள் இறங்கியுள்ளனர். இன்று வைகோ, நெடுமாறன், திருமாவளவன் உள்ளிட்டோர் கூடி ஆலோசனை நடத்தவுள்ளனர். நேற்றும் சீமான் அவசர ஆலோசனை ஒன்றை நடத்தினார். அக்கூட்டத்தில் பிரபல வக்கீல் ராம்ஜேத்மலானி மூலம் தூக்குத் தண்டனையை நிறுத்தி வைக்கக் கோரி சென்னை உயர்நீதிமன்றத்தில் மனு செய்வது என்று தீர்மானிக்கப்பட்டதாக தெரிகிறது.