குழந்தைகளை சீராட்டி.. பாராட்டி வளர்க்கிறீங்களா...?

ஒவ்வொரு குழந்தையும் நமக்கு புதிய உலகம் ஒன்றைப்
பரிசளிக்கிறது. செல்லச் சிணுங்கல்களும் கொஞ்சல் பேச்சுகளும் நிறைந்த அந்த
உலகமே ஒவ்வொரு மனிதனின் பசுமை மாறாத வசந்த காலம். சிரிப்பும், அழுகையும்
சிணுங்கலுமாகக் கழியும் ஓராயிரம் கதைகளைச் சொல்லிச் செல்லும் குழந்தைகளின்
உலகத்தை நாம் எப்படி புரிந்து கொண்டிருக்கிறோம்?

தாய்ப்பாலின் மகத்துவம் குறித்து தலைமுறை தலைமுறையாகப் பேசிக்
கொண்டிருக்கிறோம். ஆனாலும், இன்னமும் தாய்ப்பாலைத் தவிர்த்து புட்டிப்பால்
ஊட்டுகிற தாய்கள், தங்களின் குழந்தை குறித்து என்ன நினைக்கிறார்கள்?

குழந்தைகள் நம்மைப் போல சர்வசுதந்திரத்தோடு வாழப் பிறந்த ஜீவன்களே....
ஆனால், நள்ளிரவில் 'வீல்' என்று வீறிடும் குழந்தை எதற்காக அழுகிறது எனத்
தெரியாமலேயே நாம் டாக்டரைத் தேடி ஓடுகிறோம்.

'என் குழந்தை ஒல்லியாக இருக்கிறது. என்ன சாப்பிட்டாலும் உடம்பு
தேறுவதில்லை' என்று வருத்தப்படுகிற பெற்றோர் ஒரு பக்கம்; 'என் குழந்தை கொழு
கொழுவென்று இருக்கிறது' என்று பெருமைப்படுகிற பெற்றோர் மறுபக்கம். இந்த
இரண்டு தரப்புமே அந்தக் குழந்தைகளின் வளர்ச்சி இயல்பானதாக இல்லை என்பதைப்
புரிந்துகொள்வதில்லை. மனிதனின் இயல்பான பரிணாம வளர்ச்சிதான் அவனை முழு
மனிதனாக உச்சி முதல் உள்ளங்கால் வரை ஆரோக்கியத்துடன் வளரச் செய்கிறது. இதே
ஆரோக்கியமும் பரிணாம வளர்ச்சியும் உங்கள் குழந்தைக்கு வேண்டாமா?

இன்றைய பெற்றோரில் பாதிக்கும் மேலானவர்கள், தங்களுக்கு 'குழந்தை
வளர்ப்பு' பற்றி எதுவுமே தெரியவில்லை என்று அச்சப்படுகிறார்கள். ஆமாம்....!
அதனால்தான் நாம் டாக்டர்களை நம்பியே குழந்தையை வளர்க்கிறோம்!

சதாகாலமும் மருந்து உண்ணுவதையோ, மருத்துவரிடம் செல்வதையோ குழந்தைகள்
விரும்புவதில்லை. அம்மாவின் மார்புச் சூட்டில் கிடைக்கும் நிம்மதியையும்,
சுகத்தையும் ஒரு குழந்தைக்கு எந்த மருத்துவம் கொடுத்து விட முடியும்?

அம்மாவின் கருப்பையின் வெப்பத்தில் வளர்ந்த குழந்தைக்கு, வெளியில் வந்த
பிறகு இந்த அரவணைப்பும் அன்பும் கிடைக்கிறதா? சில தாய்மார்கள் தம்
குழந்தையை தொட்டுத் தூக்குவதற்குக்கூட அச்சப்படுகிறார்களே.... ஏன்?
குழந்தையின் இயல்பான வளர்ச்சிக்கு என்னென்ன உணவுகள் தேவை என்று பார்த்துக்
கொடுக்காமல், நம் நாவின் ருசிக்கு என்னென்ன வேண்டாத உணவுகள் பழக்கப்பட்டதோ
அதை எல்லாம் குழந்தைக்கும் கொடுக்கிறோமே... இதையெல்லாம் பெற்றோர் ஏன்
யோசிப்பதில்லை?

கடுமையான கண்டிப்பும் கட்டற்ற சுதந்திரமும் ஒரு குழந்தையின் வாழ்வை
எவ்விதம் திசை திருப்புகிறது என்பதை எத்தனை இளம் பெற்றோர்
அறிந்திருக்கிறார்கள்? நமது எதிர்பார்ப்புகளுக்கு ஏற்றாற்போல இல்லாமல்,
அதற்குப் புறம்பாக குழந்தை பிறந்தால் அதை நமது மனம் ஏற்றுக்கொள்ள மறுப்பது
ஏன்? எந்தக் குழந்தை பிறந்தாலும், அந்தக் குழந்தையின் வருகையால்
உற்சாகமடைந்து அதனை சீராட்டிப் பாராட்டி வளர்ப்பதுதானே பெற்றோர் கடமை?

குழந்தையை பெற்றுக்கொண்டால் மட்டும் போதாது. அதை நல்லபடியாக வளர்த்து ஆளாக்குவதுதானே ஒரு நல்ல தாய்க்கு அழகு!