ஒரு நாளில் 5 மணி நேரம் மின்தடை' தென் மாவட்ட அதிமுக வேட்பாளர்கள் கவலை

by **நண்பன்** Sun 2 Oct 2011 - 9:51

திருநெல்வேலி : உள்ளாட்சித்தேர்தல் நெருங்கும் சூழ்நிலையில் தென்
மாவட்டங்களில் இரவு, பகலாக ஒரு நாளில் 5 மணி நேரம் மின்தடை செய்யப்படுவதால்
அதிமுக வேட்பாளர்கள் கவலை அடைந்துள்ளனர். கடந்த திமுக ஆட்சிக்காலத்தில்
சென்னை தவிர தமிழகத்தின் அனைத்து பகுதிகளிலும் மின்தடை மக்களை
பாடாய்படுத்தியது. ஒரு நாளுக்கு 3 மணி நேரம், 2 மணி நேரம் மின்வெட்டு சர்வ
சாதாரணமாக அமல்படுத்தப்பட்டது. "மின்வெட்டால் விவசாயம் நலிவடைகிறது, தொழில்
வளர்ச்சி பாதிக்கப்படுகிறது' என எதிர்க்கட்சிகள், தொழில் முனைவோர்கள்
ஊர்ஊராக கூப்பாடு போட்டாலும்...மின்வெட்டு பிரச்னைக்கு முற்றுப்புள்ளி
வைக்க அப்போதைய அரசால் முடியவில்லை. சட்டசபைத்தேர்தலில் அரசுக்கு எதிரான
வலுவான பிரசாரமாக மின்வெட்டு பிரச்னை இருந்தது. அதிமுக ஆட்சிக்கு வந்ததும்
மின்வெட்டு பிரச்னை ஓரளவுக்கு தணிந்தது. எனினும் ஒரு நாளுக்கு இரு மணி நேர
மின்தடை மட்டும் தொடர்ந்து அமலில் இருந்தது. உள்ளாட்சித்தேர்தல் நெருங்கி
வரும் தற்போதைய சூழ்நிலையில் தென் மாவட்டங்களில் நெல்லை, தூத்துக்குடி
உள்ளிட்ட நகரங்கள், இதர பகுதிகளில் ஒரு நாளைக்கு பகலில் 3 மணி நேரம், இரவு
இடைவெளி விட்டு சுமார் ஒன்றரை மணி நேரம் என 5 மணி நேரத்துக்கு குறையாமல்
மின்வெட்டு செய்யப்படுகிறது. கிராமங்களில் மும்முனை மின்சப்ளை இன்றி
விவசாயப்பணிகள் வெகுவாக பாதிக்கப்பட்டுள்ளது.

இதுகுறித்து மின்வாரிய ஊழியர்கள் தரப்பில் கேட்டால், ""மழை இல்லாமல்
மின் உற்பத்தி குறைந்துவிட்டது. வழக்கமாக ஆனி துவங்கி புரட்டாசி மாதம் வரை
காற்றாலைகள் மூலம் மின்உற்பத்தி இருக்கும். இந்த ஆண்டு காற்றாலைகள் மூலம்
போதுமான மின் உற்பத்தி இல்லை. தரம் குறைந்த நிலக்கரியை பயன்படுத்துவதால்
மின்நிலையங்களில் மின் உற்பத்தி குறைந்துள்ளதாக கூறப்படுகிறது. கடந்த திமுக
ஆட்சிக்காலத்தில் தனியாரிடம் அதிக விலை கொடுத்து மின்சாரம் வாங்கப்பட்டது.
தனியாருக்கு மின்வாரியம் அளிக்க வேண்டிய தொகை 38 ஆயிரம் கோடி ரூபாய். 45
ஆயிரம் கோடி ரூபாய் கடனில் மின்வாரியம் இருப்பதால் அதை மூன்றாக பிரிப்பதாக
அப்போதைய முதல்வர் கருணாநிதி அறிவித்தார். அதிமுக ஆட்சியில் தனியாருக்கு
கூடுதல் விலை அளித்து மின்சாரம் வாங்க மாட்டோம் என அறிவிக்கப்பட்டது.

அடுத்த சில மாதங்களில் வடசென்னை, மேட்டூர், வள்ளூர் மின்நிலையங்கள்
மூலம் 2,700 மெகாவாட் மின்உற்பத்தி கிடைக்கும். இதன் மூலம் மின்பற்றாக்குறை
தீர வாய்ப்புள்ளது. தற்போது துறை மேலிட அறிவுறுத்தலின்படி நெல்லை,
தூத்துக்குடி மாவட்டங்களில் மின்தடை செய்யப்பட்டு வருகிறது'' என்றனர்.
மக்களை அவதிக்குள்ளாக்கும் வகையில் இரவிலும் மின்தடை செய்யப்படுவதால்
உள்ளாட்சித்தேர்தலில் தேவையற்ற பிரச்னைகள், போராட்டங்களை சந்திக்க
நேரிடுமோ, வெற்றி பாதிக்குமோ என அதிமுக வேட்பாளர்கள் கவலை அடைந்துள்ளனர்.
தங்கள் பகுதி மின்தடை பிரச்னையை சரிசெய்ய ஆளும்கட்சி வி.ஐ.பி.,க்கள்
மின்வாரிய அதிகாரிகளை வலியுறுத்தி வருகின்றனர்.