வெளிநாடு வாழ் இந்தியர்களின் நலனில் இந்திய அரசு கூடுதல் அக்கறை செலுத்த வேண்டும்”

by **gud boy** Mon Oct 03, 2011 10:57 pm

ஐக்கிய அரபு அமீரகத்தின் துபை நகரத்தில் இரண்டாவது தமிழர் பொருளாதார மாநாடு அக்டோபர் 1 முதல் அக்டோபர் 4 வரை உலக வர்த்தக மையத்தில் நடைபெற்று வருகிறது.

இன்று அரசாங்க உதவிகளும் சமூக ஒருங்கிணைப்பும் என்ற தலைப்பின் கீழ் நடைபெற்ற அமர்வில் தமிழகத்தைச் சார்ந்த பாராளுமன்ற உறுப்பினர் அப்துல்ரஹ்மான், ராஜ்ய சபா உறுப்பினர் ஜின்னா ஆகியோர் கலந்து கொண்டனர். இதற்கு மௌரிசியசைச் சார்ந்த முன்னாள் அமைச்சர் ஆறுமுகம் பரசுராமன் தலைமை தாங்கினார். இவர் யுனெஸ்கோ அமைப்பின் முன்னாள் இயக்குனரும் ஆவார்.

இதில் கலந்து கொண்டு உரையாற்றிய உலக தமிழ் நிறுவனத்தின் தலைவர் ஜேகப் ரவிபாலன் வெளிநாடு வாழ் இந்தியர்களின் நலனில் இந்திய அரசு போதுமான அக்கறை எடுத்துக் கொள்வதில்லை என தெரிவித்தார். உலக தமிழ் நிறுவனம் லண்டனை தலைமையிடமாக கொண்டு செயல்படுகிறது. கடந்த வருடம் சேலத்தைச் சார்ந்த 24 வயதுடைய ஒரு இளைஞர் லண்டனில் கொலை செய்யப்பட்டார். அவரது உடலை அவரது சொந்த ஊருக்கு அனுப்ப 45 நாட்கள் ஆனதை அவர் வேதனையுடன் சுட்டிக் காட்டினார். இந்தியத் தூதரகத்திற்கு பலமுறை அலைந்தும் அங்குள்ள அதிகாரிகள் உரிய நடவடிக்கை எடுக்கவில்லை என்றும் பின்னர் அப்போது நாமக்கல் ஆட்சியராக இருந்த சகாயம் துணையுடன் உடலை இந்தியாவுக்கு அனுப்ப முடிந்தது எனத் தெரிவித்தார்.

அவ்வாறே லண்டனில் சமீபத்தில் நடைபெற்ற கலவரத்தில் ஏறத்தாழ 10 மாணவர்கள் பாதிக்கப்பட்டுள்ளதாகவும் அவர்களுக்கு விசா முடிந்து விட்டதால் இந்திய தூதரகம் மூலம் இந்தியாவுக்கு அனுப்பும் முயற்சியும் அதிகாரிகளின் நடவடிக்கை இன்மை காரணமாக பாதிக்கப்பட்டுள்ளதாக தெரிவித்தார். இந்த மாணவர்களில் ஒருவர் சமீபத்தில் தற்கொலை செய்து கொண்டதாகவும் மற்றொருவர் மனநிலை பாதிக்கப்பட்டு்ள்ளதாகவும் ஜேகப் ரவிபாலன் கூறினார்.

இவருக்கு முன்பாக உரையாற்றிய பாராளுமன்ற உறுப்பினர் அப்துல் ரஹ்மானும் இந்திய அரசு வெளிநாடு வாழ் இந்தியர்களின் நலனில் கூடுதல் அக்கறை செலுத்த வேண்டும் என கேட்டுக் கொண்டார். அண்மையில் சீன அரசு ஜப்பானில் கைது செய்யப்பட்ட சீன மாலுமியை விடுதலை செய்வதற்காக எடுத்துக் கொண்ட முயற்சியையும், கொலைக்குற்றம் சாட்டப்பட்ட அமெரிக்க உளவாளி டேவிஸை பாகிஸ்தானிலிருந்து நாடு திரும்ப அமெரிக்கா எடுத்த முயற்சிகளையும் சுட்டிக்காட்டிய அவர் இந்தியாவும் இவ்வாறு ஒவ்வொரு இந்தியனின் நலனிலும் அக்கறை செலுத்தினால்தான் இந்தியா வளமான நாடு என்ற முழுமையான தகுதியைப் பெற முடியும் எனக் குறிப்பிட்டார்.