எச்.ஐ.வி.,யால் பாதிக்கப்பட்டோரின் மருத்துவ செலவிற்காகன நிதியிலும் ஊழல்

எச்.ஐ.வி.,யினால் பாதிக்கப்பட்டோருக்கான, "ஐ.என்.பி., பிளஸ்' தேசிய அமைப்பில், ஆறு கோடி ரூபாய் ஊழல் நடந்துள்ளதாக, அதன் முன்னாள் நிர்வாகி ராமபாண்டியன் தெரிவித்துள்ளார்.


இந்திய அளவில், எச்.ஐ.வி.,யினால் பாதிக்கப்பட்டோரின் நல்வாழ்விற்காக இயங்கிவரும் "ஐ.என்.பி., பிளஸ்' தேசிய அமைப்பின் முன்னாள் நிர்வாகி ராம பாண்டியன், நிருபர்களிடம் கூறியதாவது: எச்.ஐ.வி.,யால் பாதிக்கப்பட்டோரின் மருத்துவ செலவிற்காக, "பாப்புலர் பெடரேஷன் ஆப்இந்தியா' என்ற தனியார் தொண்டு நிறுவனத்தின் மூலம், "ஐ.என்.பி., பிளஸ்' அமைப்பு நிதி உதவி பெற்று வந்தது. தற்போது, "ஐ.என்.பி., பிளஸ்' அமைப்பின் நிர்வாகியாக உள்ள ஆப்ரகாம், தனக்கு சொந்தமாக இரண்டு நிறுவனங்களை ஆரம்பித்து, அதனுடைய வளர்ச்சிக்காக, எச்.ஐ.வி.,யினால் பாதிக்கப்பட்டோருக்கான நிதியை பயன்படுத்தியுள்ளார். இதைத் தொடர்ந்து, தேசிய எய்ட்ஸ் கட்டுப்பாட்டு நிறுவனத்திடம், முன்னாள் நிர்வாகிகள் அளித்த புகாரின் அடிப்படையில், "ஐ.என்.பி., பிளஸ்' அமைப்பின் நிதிநிலை பற்றி ஆராய்ந்த தனியார் நிதி ஆய்வக நிறுவனம், ஆறு கோடி ரூபாய் ஊழல் நடைபெற்றுள்ளதாக தெரிவித்துள்ளது. இந்த பணத்தை திரும்பப் பெற நடவடிக்கை எடுக்க வேண்டும். ஊழலுக்கு காரணமான "ஐ.என்.பி., பிளஸ்' நிர்வாகி ஆப்ரகாம் பதவி விலக வேண்டும். இவ்வாறு அவர் கூறினார். பேட்டியின்போது, "ஐ.என்.பி., பிளஸ்' முன்னாள் நிர்வாகிகள் மனோஜ் பர்தேசி, இளங்கோ, நரேஷ் ஆகியோர் உடனிருந்தனர்.