சத்தியமாக நான் அரசியலில் ஈடுபட மாட்டேன்

காமெடி மற்றும் குணச்சித்திர வேடங்களில் நடிக்கும் எம்.எஸ்.பாஸ்கர், கதை எழுதி நடிக்கும் படம், தகப்பன் . இதுகுறித்து நிருபர்களிடம் அவர் கூறியதாவது:

தெய்வத் திருமகள் படத்தில் என் வித்தியாசமான கெட்டப் மற்றும் நடிப்புக்கு பாராட்டு கிடைத்தது. புலி வேசம் படத்தில் வில்லனாக நடித்தேன். அது எனக்கு திருப்தி அளித்த வேடம். வேலாயுதம், கொஞ்சும் மைனாக்களே, மவுனமான நேரம், ஈட்டிகள், சடுகுடு, ஒத்தவீடு உட்பட பல படங்களில் நடிக்கிறேன்.
எப்போதோ நான் படித்த உண்மைச் சம்பவத்தை மையமாக வைத்து, கதை எழுதியுள்ளேன். தகப்பன் என்ற பெயரில் உருவாகும் இப்படத்தில், கதையின் நாயகனாக நடிக்கிறேன். கூச்ச சுபாவமும், தாழ்வு மனப்பான்மையும் கொண்ட கோழை வேடமேற்கிறேன்.
நான் நடிக்கும் படங்களில், டைரக்டர் எழுதிக் கொடுக்கும் காமெடியை ஷூட்டிங் ஸ்பாட்டில் டெவலப் செய்து நடிப்பது என் வழக்கம். இதுவரை எனக்காக தனி காமெடி டிராக் எழுதியதில்லை. கதையோடு இணைந்து வரும் காமெடி காட்சியில் மட்டுமே நடிக்கிறேன்.
கலைஞர்கள் எல்லோருக்கும் பொதுவானவர்கள். நடிகர்களுக்கு அனைத்து கட்சிகளிலும் ரசிகர்கள் உள்ளனர். என்னை பொறுத்தவரை காமெடி நடிகர்களுக்கு அரசியல் தேவை இல்லை.
அரசியல் என்பது வேறு களம். நடிகர்கள் அரசியல்வாதியாக நடிக்கலாம். கருத்துக்கள் சொல்லலாம். ஊழலை எதிர்க்கலாம். ஆனால் அரசியலில் ஈடுபடக் கூடாது.
அரசியலில் சேர்ந்தால் பலரது விருப்புக்கும், வெறுப்புக்கும் ஆளாக நேரிடும். அரசியலை விரும்பும் நடிகர்கள் சினிமாவை விட்டு விலகி முழு நேர அரசியல்வாதியாக போய் விட வேண்டும்.
சினிமா நல்ல தொழில். அதில் அரசியலை கலக்க கூடாது. ரசிகர்கள் கைதட்டல் போதும். சத்தியமாக நான் அரசியலில் ஈடுபட மாட்டேன்.
வடிவேலு அரசியலில் ஈடுபட்டதும் பிரச்சாரம் செய்ததும் அவரது சொந்த விருப்பம். என்.எஸ். கிருஷ்ணன் காலத்தில் இருந்து காமெடி நடிகர்கள் அரசியலில் ஈடுபட வில்லை என்று கூறியுள்ளார்