சொத்துக்குவிப்பு வழக்கு; மீண்டும் 22 ம் தேதி ஜெ., ஆஜராக நீதிபதி உத்தரவு

by **நேசமுடன் ஹாசிம்** Wed 9 Nov 2011 - 6:02

தமிழக முதல்வராக இருந்தபோது வருமானத்திற்கு அதிகமான சொத்து குவித்த வழக்கில் ஜெ., இன்று ஆஜராவில்லை. ஆனால் சசிகலா, சுதாகரன், இளவரசி ஆகிய 3 பேரும் ஆஜராயினர். ஜெ., வரும் 22 ம் தேதி ஆஜராக வேண்டும் என நீதிபதி உத்தரவிட்டார்.

முதல்வர் ஜெயலலிதா சொத்துக் குவிப்பு வழக்கு, பெங்களூரு சிறப்பு கோர்ட்டில் நடந்து வருகிறது. இந்த வழக்கில், அனைத்து சாட்சிகளையும் விசாரித்து முடித்த நிலையில், குற்றம் சாட்டப்பட்டவர்களிடம் விசாரணை நடத்த ஜெயலலிதா நேரில் ஆஜராக கோர்ட் உத்தரவிட்டது. ஆனால், ஜெயலலிதா தரப்பில், வீடியோ கான்பரன்ஸ் அல்லது ஸ்டேட்மென்ட் மூலம் பதிலளிப்பதாகக் கூறி தாக்கல் செய்த மனுவை கோர்ட் நிராகரித்தது. இதையடுத்து, சுப்ரீம் கோர்ட் சென்ற ஜெயலலிதாவுக்கு, அக்., 20ம் தேதி கண்டிப்பாக பெங்களூரு சிறப்பு கோர்ட்டில் ஆஜராக வேண்டும் என பணித்தது.

கடந்த 20 மற்றும் 21 ம் தேதிகளில் நீதீபதி மல்லிகார்ஜூனய்யா முன்பு ஆஜராகி விளக்கம் அளித்தார், இவரிடம் 500 க்கும் மேற்பட்ட கேள்விகள் கேட்கப்பட்டன. இவை அனைத்தும் சேர்த்த சொத்து மற்றும் நகைகள் தொடர்பானவை.

மீண்டும் 8ம் தேதி ( இன்று ) ஆஜராக வேண்டும் என உத்தரவிட்டது. ஆனால் இன்றும் ஆஜராவதில் இருந்து விலக்கு அளிக்க வேண்டும். கேள்வி- பதிலை எழுத்து மூலமாக தாக்கல் செய்ய உத்தரவிட வேண்டும் என சுப்ரீம் கோர்ட்டில் மனுத்தாக்கல் செய்தார். இந்த மனுவை விசாரித்த நீதிபதிகள் ஆஜராவதில் இருந்து விலக்கு அளிக்க முடியாது. விசாரணைக்கு ஒத்துழைப்பு அளிக்க வேண்டும். விலக்கு அளிப்பது தவறான முன்னுதாரணத்தை ஏற்படுத்தும் என்றும், முதல்வருக்கு வசதி இல்லையென்றால் மாற்று தேதியில் விசாரணையை வைத்து கொள்ள சிறப்பு கோர்ட்டில் மனுத்தாக்கல் செய்யலாம் என்றும் கூறியிருந்தது.

இந்நிலையில், முதல்வர் ஜெயலலிதா மீதான சொத்துக்குவிப்பு வழக்கு விசாரணை இன்று காலை 11 மணிக்கு துவங்கியது. காலை 11.45 வரை விசாரணை நடந்தது. இவ்விசாரணையின் போது, ஜெ., சார்பில் அவரது வக்கீல் குமார் ஒரு மனுவை தாக்கல் செய்தார். அதில், தமிழகத்தில் தற்போது கடும் மழை பெய்து வருகிறது. இதனால் ஏற்பட்ட வெள்ளப்பெருக்கு காரணமாக 10 பேர் வரை இறந்துள்ளனர். வரும் 13 மற்றும் 14ம் தேதி கலெக்டர்கள் மாநாடு நடக்கவுள்ளது. இதன் காரணமாக இன்று தம்மால் விசாரணைக்கு ஆஜராக முடியவில்லை என்று தெரிவிக்கப்பட்டுள்ளது. மேலும் வரும் 22ம் தேதி ஆஜராக அனுமதி வழங்கும்படியும் மனுவில் கோரப்பட்டிருந்தது. இதற்கு அரசு தரப்பில் எவ்வித எதிர்ப்பும் தெரிவிக்கப்படாததால், ஜெ., வரும 22ம் தேதி நேரில் ஆஜராக வேண்டும் என்றும், தேவைப்பட்டால் 23ம் தேதியும் விசாரணை நடைபெறும் என்றும் நீதிபதி மல்லிகார்ஜூனையா உத்தரவிட்டார். இன்றைய விசாரணையின் போது, சசிகலா, இளவரசி மற்றும் சுதாகரன் ஆகியோரிடம் விசாரணை நடைபெறவில்லை.