இந்தியாவின் விளையாட்டு மைதானமாக ஆப்கானிஸ்தான் உள்ளது

"இந்தியாவின் விளையாட்டு மைதானமாக ஆப்கானிஸ்தான் உள்ளது'' என, பாகிஸ்தான் முன்னாள் அதிபர் முஷாரப் தெரிவித்துள்ளார். பாகிஸ்தான் முன்னாள் அதிபர் முஷாரப், தற்போது அமெரிக்கா மற்றும் லண்டனில் தங்கியுள்ளார். பாகிஸ்தானில், அவர் மீது ஏராளமான குற்றச்சாட்டுகள் உள்ளன.
முன்னாள் பிரதமர் பெனசிர் கொல்லப்பட்ட வழக்கிலும், அவர் மீது குற்றச்சாட்டு உள்ளது. எனவே, தாயகம் திரும்பினால் கைது செய்யப்பட உள்ளார்.


இதற்கிடையே, அவர் பி.பி.சி.,"டிவி'க்கு அளித்த பேட்டியில் கூறியிருப்பதாவது: பாகிஸ்தானில் உள்ள பல்வேறு பிரிவினைவாதங்களால், அங்கு குழப்ப நிலை காணப்படுகிறது. அபோதாபாத்தில் ஒசாமா பின்லாடன் ஒளிந்திருந்ததால், அந்நாட்டின் ராணுவப் பாதுகாப்பு சரியில்லை என கூற முடியாது. பயங்கரவாதத்தை ஒழிக்க, நான் அமெரிக்காவுடன் நட்புறவு கொண்டிருந்த அதே வேளையில், தலிபான் போன்ற அமைப்புகளுடன் தொடர்பு வைத்திருந்ததாகக் கூறப்படும் குற்றச்சாட்டு அடிப்படையில்லாதது.
தலிபான் தலைவர் முல்லா ஓமர், பாகிஸ்தானில் இருப்பதாகத் தெரியவில்லை. இதையே தான் ஒசாமா பின்லாடன் விஷயத்திலும் கூறினேன். உண்மையிலேயே ஒசாமா பாகிஸ்தானில் இருந்தது எனக்குத் தெரியாது. ஆப்கானிஸ்தானில் பாகிஸ்தான் எதிர்ப்பு பிரசாரத்தை, இந்தியா செய்து வருகிறது. இதற்கு, ஏராளமான ஆதாரங்களை நான் காட்ட முடியும். காந்தகார், ஜலாலாபாத் ஆகிய இடங்களில், இந்திய தூதரங்கள் அமைக்கப்பட்டுள்ளன. ஆப்கானிஸ்தான் ராணுவத்தினருக்கு, இந்தியாவில் பயிற்சி அளிக்கப்படுகிறது. இதன் மூலம், அவர்கள் பாகிஸ்தான் எதிர்ப்பு பிரசாரத்தை செய்து வருகின்றனர். கடந்த 50 ஆண்டுகளாக, ரஷ்யா மற்றும் இந்தியாவின் விளையாட்டு மைதானமாக, ஆப்கானிஸ்தான் இருந்து வருகிறது.
என்னை கைது செய்யும் சூழ்நிலை காணப்பட்டாலும், அடுத்த ஆண்டு மார்ச் 23ம்தேதி, பாகிஸ்தான் திரும்ப உள்ளேன். பெனசிர் புட்டோவுக்கு, போதிய பாதுகாப்பு கொடுக்காததற்கு, அதிபராக இருந்த நான் எந்த விதத்திலும் பொறுப்பாக முடியாது. ஏனென்றால், 2002க்கு பிறகு, பாகிஸ்தானில் பார்லிமென்ட் நடைபெற்றது. பிரதமர் இருந்தார். அவர்கள் தான் பாதுகாப்பு விஷயங்களுக்குப் பொறுப்பேற்க வேண்டும். இவ்வாறு, முஷாரப் கூறினார்.