சுரங்க ஊழலில் மத்திய மந்திரி எஸ்.எம். கிருஷ்ணா பதவிக்கு ஆபத்து; விசாரணை நடத்த நீதிபதி உத்தரவு

சுரங்க ஊழலில் மத்திய மந்திரி எஸ்.எம். கிருஷ்ணா பதவிக்கு ஆபத்து; விசாரணை நடத்த நீதிபதி உத்தரவு
கர்நாடகத்தில் லோக் ஆயுக்தா நீதிமன்றம் எடுக்கும் நடவடிக்கையால் அரசியல் பிரபலங்கள் ஊழல் வழக்கில் சிக்கி வருகிறார்கள். முதல் மந்திரியாக இருந்த எடியூரப்பா மீது நில மோசடி புகார் கூறப்பட்டது. இதை விசாரித்த லோக் ஆயுக்தா நீதிமன்றம் அவர் நில மோசடியில் ஈடுபட்டு இருப்பதை வெட்ட வெளிச்சமாக்கியது.

இதையடுத்து எடியூரப்பா பதவி இழந்தார். அவர் மீது வழக்கு பதிவு செய்யப்பட்டதை தொடர்ந்து கைதாகி சிறையில் அடைக்கப்பட்டார். பல நாள் சிறை வாசத்துக்குப் பின் ஜாமீனில் விடுதலை செய்யப்பட்டார். அவரைத் தொடர்ந்து சட்ட விரோத சுரங்க ஊழலில் சிக்கிய ரெட்டி சகோதரர்களும் பதவி இழந்தனர்.

பாரதீய ஜனதா கட்சியைச் சேர்ந்த எடியூரப்பாவை ஊழல் வழக்கில் சிக்க வைக்க காங்கிரசும், ஐக்கிய ஜனதா தளம் தலைவர் குமாரசாமியும் பகீரத பிரயத்தனம் செய்து வந்தனர். இப்போது காங்கிரஸ் மீதும், குமாரசாமி மீதும் வழக்கு திரும்பி உள்ளது. தற்போது மத்திய வெளியுறவுத்துறை மந்திரியாக இருக்கும் எஸ்.எம். கிருஷ்ணா முன்பு கர்நாடக முதல் மந்திரியாக இருந்தார். அவரது ஆட்சி காலத்தில் சட்டவிரோத தொழில் முறைகேடு நடந்து இருப்பதாக டி.ஜே, ஆபிரகாம் என்பவர் லோக் ஆயுக்தா சிறப்பு நீதிமன்றத்தில் புகார் அளித்து இருந்தார்.

இதேபோல் கர்நாடக முதல் மந்திரிகள் தரம் சிங், குமாரசாமி ஆகியோர் மீதும் சட்டவிரோத சுரங்கத் தொழிலில் ஈடுபட்டதாக லோக் ஆயுக்தா நீதிமன்றத்தில் புகார் கூறப்பட்டது.

இந்த புகார்களை லோக் ஆயுக்தா நீதிபதி என்.கே. சுதீந்திர ராவ் விசாரணைக்கு ஏற்றுக் கொண்டார். இதன் மீது லோக் ஆயுக்தா கூடுதல் டி.ஜி.பி. சத்திய நாராயண ராவ் உடனடியாக விசாரணை நடத்தி வருகிற ஜனவரி மாதம் 6ம் திகதி கோர்ட்டில் விசாரணை அறிக்கை தாக்கல் செய்யுமாறு உத்தரவிட்டுள்ளார்.

இதையடுத்து எஸ்.எம். கிருஷ்ணா, தரம்சிங், குமாரசாமி ஆகியோர் லோக் ஆயுக்தா விசாரணை வரம்புக்குள் சிக்கியுள்ளனர். எஸ்.எம். கிருஷ்ணா மத்திய மந்திரியாக இருப்பதால் அவரது பதவிக்கு ஆபத்து ஏற்பட்டு உள்ளது. எடியூரப்பா மீது ஊழல் புகார் கூறப்பட்டதும் அவரை ராஜினாமா செய்யுமாறு காங்கிரஸ் கட்சி கோரிக்கை விடுத்து போராட்டத்தில் ஈடுபட்டது.

அது போல் எஸ்.எம். கிருஷ்ணாவுக்கும் நெருக்கடி உருவாகி உள்ளது. இதனால் காங்கிரசுக்கும் தர்மசங்கடமான நிலை ஏற்பட்டுள்ளது. ஜனவரி 6ம் திகதி விசாரணை அறிக்கை தாக்கல் ஆகும் போது எஸ்.எம். கிருஷ்ணா பதவி விலக வேண்டிய கட்டாயம் ஏற்படும்.

இது கர்நாடக அரசியலில் மட்டுமல்லாது. டெல்லி அரசியலிலும் பரபரப்பை ஏற்படுத்தும். சட்டவிரோத சுரங்க ஊழலுக்கு மூல காரணமே எஸ்.எம். கிருஷ்ணா தான் என்று புகாரில் டி.ஜே.ஆபிரகாம் தெரிவித்துள்ளார்.

எல்லாம் ஊழல் பெருச்சாலிகள்தான்