அலைகடலின் அழுகுரல்…புலவர். தொ. சூசை மைக்கேல்

ஓடி வருகுதடி அலைகடல் – மிக
உருண்டு அதிருதடி அலைகடல்…
தேடி வருகுதடி அலைகடல் – நமைத்
தீண்டி வருடுதடி அலைகடல்…

மாறி மருளுதடி அலைகடல் – மனம்
மாய்ந்து புரளுதடி அலைகடல்…
தேரி மணல்முகடு தொடுகையில் – ஒரு
செய்தி சொல்லுதடி அலைகடல்…

விரிச்சல் போடுதடி அலைகடல் – ஒளி
வீச்சு கூட்டுதடி அலைகடல்…
சிரிச்சிச் சிணுங்குதடி அலைகடல் – அவள்
செய்கை ஒவ்வொன்றும் கவிமடல்…

இடிமுழக்கமடி அலைகடல் – புது
இசைமுழக்கமடி அலைகடல்…
மடிவளைக்கும் மற முக்குவர் – மடி
மடிய வைக்கு(ம்)மடி அலைகடல்…

ஈரக் கரையோர மணல்திடல் – தனில்
இருந்து அரசாளும் அலைகடல்…
யாரைக் கண்டாலும் அருகினில் – வந்து
யாதுமாகிறவள் அலைகடல்…

தாழை கற்றாழை இவற்றிடை – நுரை
தானம் வழங்கிவரும் அலைகடல்…
ஏழை பணக்காரர் அனைவரும் – சமம்
என்று முழங்கிவரும் அலைகடல்…

என்ன சொல்கிறாள், அலைகடல்? – ஏன்
இன்னும் தூங்கவில்லை, அலைகடல்?...
தன்னைத் தாக்கவரும் அணு உலை – கண்டு
தவித்துக் கொதிக்கிறாள் அலைகடல்…

கூடங்குளம் மக்கள் கூக்குரல் – அது
கொள்கை மறவர்கள்தம் போர்க்குரல்…
நாடெங்கிலும் நேர்ந்த அழிவுகள் – சொல்லி
நடுங்கி அதிர்கிறாள், அலைமகள்…

பொங்கி எழுகிறாள் அலைகடல் – மனம்
புழுங்கி அழுகிறாள் அலைகடல்…
எங்கும் நிகழும் அணுக் கொடுமைகள் – தமை
எண்ணி அழுகிறாள் அலைமகள்…

அன்னை அலைகடலின் அழுகுரல் – அது
அடங்க வேண்டுமடி விரைவினில்…
சின்ன மதியினர்தம் இழிசெயல் – அறத்
திரள்க, தமிழர் ஓர் அணியினில்!...

-புலவர். தொ. சூசை மைக்கேல்

சூசை மைக்கேல் சூசகமாக அணு உலை பற்றி பதறி எழுதி இருக்கிறார் .ஆனால் 15000 கோடிகள் செலவு செய்து ஒரு அழிவு அணு உலையை செய்ய நாம் ஒன்னும் பைத்தியக் காரர்கள் இல்லை என்பதை மைக்கேல் உணர வேண்டும்

jasmin wrote:சூசை மைக்கேல் சூசகமாக அணு உலை பற்றி பதறி எழுதி இருக்கிறார் .ஆனால் 15000 கோடிகள் செலவு செய்து ஒரு அழிவு அணு உலையை செய்ய நாம் ஒன்னும் பைத்தியக் காரர்கள் இல்லை என்பதை மைக்கேல் உணர வேண்டும்

அணுவுலை வேண்டுமென்பதுதான் என்கருத்தும். இக்கவிதை அதன் அழகிற்காக இங்கு பதித்தேன் ...!

அலைகடலின ஆர்ப்பரிப்பை தற்கால நிகழ்வுடன் கோர்த்து அழகாக அன்னைத்தமிழை வழக்கம் போல தான் வசமாக்கி வரிகளாய் மாற்றி நம்மை வசியம் செய்கிறார் கவிஞர்... தமிழும் அழகு அவரின் சிந்தனையும் அதனை வெளிக்கொணர்ந்த பாங்கும் அழகு ஆயினும் அந்த ஒன்றைத் தவிர...
அணு உலை பற்றிய அய்யாவின் கருத்துக்கு மறுப்புப்புறம் நாம் என்றாலும் இந்தப் பொங்கு தமிழுக்கு நான் என்றும் என்னை நான் இழக்கிறேன்...

மிகவும் அருமையாக உள்ளது மேடம் பகிர்வுக்கு நன்றி
:!+: :!+: