எகிப்தில் தொடர்ந்து 4 ஆவது நாளாகவும் மக்கள் போராட்டம்

by *சம்ஸ் Tue 20 Dec 2011 - 6:21

இதுவரை 11 பேர் பலி
எகிப்து தலைநகர் கெய்ரோவில் தொடர்ந்து நான்காவது நாளாகவும் நேற்று இடம்பெற்ற மக்கள் போராட்டத்தில் பலியானோர் எண்ணிக்கை 11 ஆக உயர்ந்துள்ளது. இதில் நேற்றைய தினம் ஒருவர் மரணமடைந்தார்.

தஹ்ரியார் சதுக்கத்தில் கூடிய போராட்டக்காரர்கள் மீது பொலிஸ் மற்றும் இராணுவத்தினர் தடியடி பிரயோகம் நடத்தியதோடு கூட்டத்தை கலைக்க கண்ணீர் புகைக் குண்டுகளையும் எறிந்தனர். பதிலுக்கு ஆர்ப்பாட்டக்காரர்கள் பாதுகாப்பு படைகள் மீது கற்களால் தாக்குதல் நடத்தினர்.

இதன்போது துப்பாக்கிச் சூட்டு சத்தங்களும் கேட்டதாக சம்பவத்தை நேரில் பார்த்த அஹமட் ரபாத் என்பவர் பி.பி. சிக்கு தெரிவித்துள்ளார்.

இந்த கலவரத்தில் நேற்றைய தினம் ஒருவர் மரணமடைந்ததாக எகிப்து உதவி சுகாதார அமைச்சர் அதல் அதாவி குறிப்பிட்டுள்ளார். அத்துடன் நேற்று முன்தினம் ஏற்பட்ட கலவரத்தில் 201பேர் காயம் அடைந்ததாக அவர் குறிப்பிட்டார்.

எகிப்தில் இரண்டாது கட்ட பொதுத் தேர்தல் இடம்பெற்று முடிந்த நிலையிலேயே கெய்ரோவில் மீண்டும் மக்கள் போராட்டம் வெடித்துள்ளது. கடந்த வெள்ளிக்கிழமை ஆரம்பமான போராட்டம் தொடர்ந்து நீடித்து வருகிறது.

இதில் இராணுவ வீரர்கள் ஆர்ப்பாட்டக்காரர்கள் மீது கண்மூடித்தனமாக தாக்குதல் நடத்தும் புகைப்படங்கள் வெளியாகி சர்வதேச கண்டனத்துக்கு உள்ளானது. இதில் பல இராணுவ வீரர்கள் இணைந்து ஒரு பெண் மீது தாக்குதல் நடத்தும் புகைப்படம் பெரும் சர்ச்சையை கிளப்பியுள்ளது.

எகிப்தில் ஆளும் இராணுவ கவுன்ஸிலை பதவி விலகக் கோரியே மக்கள் தொடர்ந்து ஆர்ப்பாட்டத்தில் ஈடுபட்டு வருகின்றமை குறிப்பிடத்தக்கது.