ஈரான் யுரேனியம் அடங்கிய எரிபொருள் கம்பிகள் தயாரிப்பு

ஈரான் யுரேனியம் அடங்கிய எரிபொருள் கம்பிகள் தயாரிப்பு
ராடாரில் சிக்காத ஏவுகணையும் பரிசோதிக்கப்பட்டது
அணுமின் நிலையங்களில் பயன்படுத்தப்படும் யுரேனியம் அடங்கிய எரிபொருள் கம்பிகள் தயாரித்து வெற்றிகரமாகப் பரிசோதித்து விட்டதாக ஈரான் அறிவித்துள்ளது. மேலும் வானில் உள்ள இலக்கை தரையிலிருந்து தாக்கும் குறுகிய தூர ஏவுகணையையும் பரிசோதித்துள்ளதாக, அந்நாடு அறிவித்துள்ளது.

ஈரான் தனது சுய தேவைகளுக்காக அணுசக்தியைப் பயன்படுத்துவதாக கூறி வருகையில், அமெரிக்காவும், மேற்குலக நாடுகளும், அணு குண்டு தயாரிப்பதற்காகத்தான், ஈரான் தனது அணுசக்தியைப் பயன்படுத்துவதாகக் குற்றம்சாட்டி வருகின்றன. அதனால் ஈரான் அணுமின் நிலையங்களுக்கான எரிபொருள் விநியோகத்திற்கு அமெரிக்காவும், மேற்குலக நாடுகளும் தடை விதித்துள்ளன.

இந்நிலையில், நேற்று முன்தினம் காலையில் ஈரானின் அதிகாரபூர்வ ஐ.ஆர். என். ஏ. செய்தி நிறுவனம் வெளியிட்ட செய்தி ஒன்றில், வானில் உள்ள இலக்கை தரையில் இருந்து தாக்கும் குறுகிய தூர ஏவுகணை ஒன்று, வெற்றிகரமாக பரிசோதிக்கப்பட்டதாகத் தெரிவித்தது.

ஏவுகணை சோதனைக்குப் பின் மவுசாவி கூறுகையில்:- “இந்த ஏவுகணை, நவீன தொழில்நுட்பத்துடன் கூடியது. அதோடு, ராடாரின் கண்காணிப்பில் சிக்காத இலக்குகளையும், இந்த ஏவுகணை தாக்கக் கூடிய வல்லமை படைத்தது’’ என்றார்.

மேலும், முதன் முதலாக உள்நாட்டில் வடிவடைக்கப்பட்ட, நவீன தொழில் நுட்பத்தோடு கூடிய ஏவுகணை ஒன்று பரிசோதிக்கப்பட்டது இதுவே, முதன் முறை என்பது குறிப்பிடத்தக்கது.

இந்நிலையில், நேற்று முன்தினம் ஈரான் செய்தி நிறுவனம் வெளியிட்ட மற்றொரு செய்தியில், ஈரான் அணுமின் நிலையங்களில் மின்சார உற்பத்திக்காக பயன்படுத்தப்படும் யுரேனியம் அடங்கிய எரிபொருள் கம்பிகள் தயாரிக்கப்பட்டு, வெற்றிகரமாக சோதனையும் செய்யப்பட்டதாகவும் தெரிவித்துள்ளது.

இந்த கம்பிகள், டெஹ்ரான், ஆய்வு அணு உலையில் பரிசோதிக்கப்பட்டுள்ளன. இது குறித்து டெஹ்ரான் டைம்ஸ் வெளியிட்டுள்ள செய்தி ஒன்றில், ஈரான், அணு எரிபொருளைத் தயாரிக்க முடியாது என, கொக்கரித்த மேற்குலக நாடுகள் , இந்தத் தயாரிப்பால், நிச்சயம் திகைத்துவிடும்’ என குறிப்பிடப்ப ட்டுள்ளது. பொதுவாக, அணுமின் நிலையங்களில் பயன்படுத்தப்படும் எரிபொருள் கம்பிகளில் குறைவாக செறிவூட்டப்பட்ட யுரேனியம் தான் எரிபொருளாகப் பயன்படுத்தப்படும். அணுகுண்டு உள்ளிட்ட அணு ஆயுதங்கள் தயாரிக்க, அதிகளவில் செறிவூட்டப்பட்ட யுரேனியம் வேண்டும் என்பது குறிப்பிடத்தக்கது.