ரூ. 96 இலட்சம் புயல் நிவாரண உதவி: நித்யானந்தா

by *சம்ஸ் Fri 6 Jan 2012 - 12:20

ரூ. 96 இலட்சம் புயல் நிவாரண உதவி: நித்யானந்தா
புதுச்சேரி;
புயலால் பாதிக்கப்பட்ட புதுச்சேரி, கடலூர் பகுதிகளுக்கு ரூ. 96 இலட்சத்தில் நிவாரண உதவிகள் வழங்கப்படும் என்று சுவாமி நித்யானந்தா கூறினார்.

புதுச்சேரியை அடுத்த ஏம்பலம் கிராமத்தில் உள்ள நித்யானந்தா தியான பீட ஆஸ்ரமத்தில் புதன் கிழமை செய்தியாளர்களிடம் அவர் கூறியது,

புயலால் பாதிக்கப்பட்ட மக்களுக்குத் தேவையான உதவிகளைச் செய்ய இங்கு வந்துள்ளோம். தினமும் ஒரு இலட்சம் பேருக்கு உணவுப் பொட்டலங்கள் தயார் செய்து விநியோகிக்கப்படுகிறது.

மேலும் மக்களுக்குத் தேவையான வேட்டி, சேலை, போர்வை போன்ற துணி வகைகளைத் தருகிறோம். இந்த பணியில் 10 நாடுகளைச் சேர்ந்த 600 தன்னார்வலர்கள் பங்கேற்றுள்ளனர்.

சாலைகளின் குறுக்கே விழுந்துள்ள மரங்களை அப்புறப்படுத்த, உள்ளாட்சி அமைப்புகளின் கோரிக்கையை ஏற்று இதுவரை 6 பொக்லைன், 6 டிராக்டர்களை வரவழைத்திருக்கிறோம்.

மேலும் 20 பொக்லைன், 20 டிராக்டர்கள் சென்னை மற்றும் திருவண்ணாமலையில் இருந்து வரவழைக்கப்பட்டுள்ளன. வியாழக்கிழமை அவையும் சீரமைப்புப் பணிகளில் ஈடுபடுத்தப்படும்.

மேலும், 6 ஜெனரேட்டர்கள் வழங்க இருக்கிறோம் 40 ஆயிரம் மக்களை இலக்காகக் கொண்டு, இலவச மருத்துவப் பரிசோதனை முகாம்களும் நடத்தப்படுகின்றன. உணவு, உடை, சுகாதாரம் போன்ற உடனடி நிவாரணப் பணிகளுக்காக மட்டும் இதுவரை ரூ. 25 இலட்சம் செலவிட்டுள்ளோம். நிரந்தர நிவாரணப் பணிகளைச் செய்ய திட்டமிட்டு வருகிறோம். அரசுடன் கலந்தாலோசித்து வருகிறோம்.

கடலோரப் பகுதிகளில் சிவலிங்கங்களைப் பிரதிஷ்டை செய்தால் இது போன்ற இயற்கைச் சீற்றங்கள் ஏற்படாது என்பது நம்பிக்கை. அதனால் 8 மீனவக் குப்பங்களில் 12 சிவலிங்கங்கள் பிரதிஷ்டை செய்யப்படும்.

எம் பலம் தியானபீடம் உள்ள பகுதியில் 100 படுக்கை கொண்ட மருத்துவமனை கட்டுவதற்காக ஒதுக்கப்பட்ட நிதியைத்தான் தற்போது புயல் நிவாரணப் பணிகளுக்குப் பயன்படுத்தியிருக்கிறோம். விரைவில் மருத்துவமனை கட்ட நிதி ஒதுக்கீடு செய்து, பணிகளைத் தொடங்குவோம் என்றார் நித்யானந்தா.