வானம் ஏன் நீலமாக இருக்கிறது? பூமி உருண்டை எத்தனை கிலோ இருக்கும்? விமானம் எப்படி விழாமல் பறக்கிறது ?

இந்த காலத்து குழந்தைகள் நம்மைவிட மகா புத்திசாலிகள் என்று அலுத்துக் கொள்ளும் பாணியில் பெருமை பாராட்டாத பெற்றோர் யார் இருக்கிறார்கள். குறிப்பாக அம்மாக்கள். அதெல்லாம் பார்வைக்குதானாம். வாண்டுகள் வாய் ஓயாமல் கேட்கும் கேள்விகளால் மனதுக்குள் புழுங்கி, மவுனமாக சினந்து, சுய பச்சாதாபத்துக்கு ஆளாகும் பெற்றோர் அதிகம் என்று ஆய்வு மூலம் தெரிய வந்திருக்கிறது.



தெரிந்த உண்மைகள்கூட ஆய்வுகள் துணையோடு அரங்கேறும்போதுதான் நிஜமான உண்மை என்ற அங்கீகாரம் கிடைக்கிறது.
தாங்கள் பள்ளி சென்ற காலத்தில் அறிவியலை கணிதத்தை இவ்வளவு விவரமாக ஆசிரியர்கள் சொல்லித் தரவில்லை என்று ஆய்வுக்கு வந்தவர் காதில் பூ சுற்றியுள்ளனர் பல பெற்றோர். எங்கள் காலத்தைவிட அறிவியலும் கணிதமும் இப்போது மாறியிருக்கிறது என்று சிலர் சான்றளித்துள்ளனர்.

வானம் ஏன் நீலமாக இருக்கிறது? பூமி உருண்டை எத்தனை கிலோ இருக்கும்? விமானம் எப்படி விழாமல் பறக்கிறது? வேற்று கிரகத்து ஆட்களை எப்போது சந்திப்போம்? தண்ணீர் ஏன் ஈரமாக இருக்கிறது? மழை பெய்யும்போது வண்டுகள் எல்லாம் எங்கே தங்கும்? ஒவ்வொரு நாட்டிலும் கடிகாரம் ஏன் வெவ்வேறு நேரம் காட்டுகிறது? வானவில்லில் எப்படி கலர் வருகிறது? & இப்படியான கேள்விக்கணைகள் துளைக்கும்போது பெற்றவர்கள் மிரண்டு போகிறார்கள்.

‘பிசியாக இருக்கிறேன். அம்மாவிடம் கேளேன்’ என்று நழுவும் அப்பாக்கள்; ‘பெண்களுக்கு அறிவியல் சுருக்கமாகதான் நடத்துவார்கள். அப்பாவுக்கு நிச்சயம் தெரிந்திருக்கும்’ என்று தள்ளிவிடும் அம்மாக்கள். மனதில் தோன்றியதை பதிலாக சொல்லி சமாளிக்கும் பெற்றோர். இதுக்கெல்லாம் விடையே கிடையாது என்கிற அதிரடி பெற்றோர். இந்நிலையில் குழந்தைகள் எங்கே விடை தேடும்?

விடைகளை கண்டுபிடிக்க விரல் நுனியில் வசதிகள் வந்துவிட்ட சூழலில் அதனை பயன்படுத்தி குழந்தைக்கு பதிலளிக்கும் பெற்றோர் குறைவு. ஆனால் அவர்கள் அடையும் மகிழ்ச்சி அதிகம். கணிதமும் அறிவியலும் மனிதகுல முன்னேற்றத்துக்கு அத்தியாவசியமான அறிவுப்பாதை. அடுத்த தலைமுறையை அதில் கைபிடித்து அழைத்துச் செல்லாவிட்டாலும், ஒதுங்கி நின்று வழிகாட்டும் கடமையை மட்டுமாவது பெற்றோர் மறக்காமல் செய்வதுதான் நல்லது. நோபல் பரிசுகள் கேட்பாரற்று கிடந்தால் யாருக்கு நன்மை?

விடையில்லாக் கேள்வி,,,

ஏன்......................