நைஜீரியா குண்டு வெடிப்பில் சாவு 162ஆக உயர்வு

by **நண்பன்** Sun 22 Jan 2012 - 13:35

நைஜீரியாவின் வடக்கு பகுதியில் உள்ள 2-வது பெரிய நகரமான கானோவில் நேற்று தொடர் குண்டு வெடிப்பு தாக்குதல் நடத்தப்பட்டது. அங்குள்ள 5 போலீஸ் நிலையங்கள், 2 குடியுரிமை அலுவலகங்கள், போலீஸ் தலைமை அலுவலகம் ஆகிய இடங்களில் போகாஹாரம் என்ற அமைப்பை சேர்ந்த தீவிரவாதிகள் அடுத்தடுத்து குண்டுகளை வெடிக்க செய்தனர்.

இதனால் கானோ நகரில் கடும் பதட்டமும் பரபரப்பும் ஏற்பட்டது. அதைத் தொடர்ந்து அங்கு ஊரடங்கு உத்தரவு பிறப்பிக்கப்பட்டது.

இந்த குண்டு வெடிப்பு சம்பவங்களில் 7 பேர் பலியானதாக முதலில் கூறப்பட்டது. ஆனால் தற்போது சாவு எண்ணிக்கை 162ஆக உயர்ந்துள்ளது. பலியானவர்களில் பொதுமக்களுடன் ஏராளமான போலீசாரும் அடங்குவர். இறந்தவர்களின் உடல்கள் கானோவில் உள்ள மிகப்பெரிய ஆஸ்பத்திரியான முர்தலா முகமது சிறப்பு ஆஸ்பத்திரியில் வைக்கப்பட்டுள்ளது. அங்கு பிரேத பரிசோதனைக்கு பிறகு உடல்கள் உறவினர்களிடம் ஒப்படைக்கப்பட்டது. மற்றவர்களின் உடல்கள் பாதுகாப்பாக வைக்கப்பட்டுள்ளது.

இதற்கிடையே, குண்டு வெடிப்பில் பலியாகி தெருக்களில் கிடப்போரின் பிணங்களை ராணுவ வீரர்களும், போலீசாரும் சேகரித்து ஆஸ்பத்திரிக்கு அனுப்பி வருகின்றனர். இதனால் சவக்கிடங்கில் பிணங்கள் குவித்து வைக்கப்பட்டுள்ளன. எனவே, சாவு எண்ணிக்கை மேலும் உயரும் அபாயம் உள்ளதாக ஆஸ்பத்திரி டாக்டர்கள் தெரிவித்தனர்.

குண்டு வெடிப்பில் 50 பேர் காயம் அடைந்துள்ளனர். அவர்களில் இந்தியர்கள் உள்ளிட்ட வெளிநாட்டினரும் அடங்குவர். அவர்கள் போலீஸ் தலைமை அலுவலகம் அருகே வசித்தவர்கள். காயம் அடைந்த அனைவருக்கும் அமினுகானோ பயிற்சி ஆஸ்பத்திரியில் தீவிர சிகிச்சை அளிக்கப்பட்டு வருகிறது. மேலும் இவர்களுக்கு நைஜீரியாவின் செஞ்சிலுவை சங்கத்தினர் உதவி புரிந்து வருகின்றனர்.

இந்த குண்டு வெடிப்புகளுக்கு போகா ஹாரம் தீவிரவாத அமைப்பு பொறுப்பு ஏற்றுள்ளது. இதுகுறித்து அதன் செய்தி தொடர்பாளர் அபுல்குவாகா பத்திரிகை நிருபர்களுக்கு தகவல் அனுப்பியுள்ளார்.

போலீஸ்காரரால் கைது செய்யப்பட்டுள்ள போகோ ஹாரம் தீவிரவாதிகளை விடுதலை செய்ய அரசு மறுத்து வருகிறது. எனவேதான் இந்த தாக்குதல்கள் நடத்தப்பட்டது என கூறியுள்ளார்.

நைஜீரியாவின் வடக்கு பகுதியில் உள்ள கானோவில் 90 லட்சம் பேர் உள்ளனர். இங்கு அரசியல் மற்றும் மதரீதியிலான கலவரங்கள் நடந்து வருகின்றன. கடந்த ஆண்டில் மட்டும் இப்பகுதியில் 510 பேரை போகோஹாரம் தீவிரவாதிகள் கொன்று குவித்துள்ளனர்.

மாலை மலர்

by **நண்பன்** Sun 22 Jan 2012 - 13:38

கொடுமையான சம்பவம்

நைஜீரியா குண்டு வெடிப்பில் சாவு 162ஆக உயர்வு

நைஜீரியா குண்டு வெடிப்பில் சாவு 162ஆக உயர்வு

Re: நைஜீரியா குண்டு வெடிப்பில் சாவு 162ஆக உயர்வு