தூத்துக்குடி-கொழும்பு இடையே 500 பேர் செல்லும் சிறிய கப்பல் விரைவில் இயக்கப்படும்

by **முனாஸ் சுலைமான்** Mon 13 Feb 2012 - 12:40

சேது சமுத்திர திட்டத்திற்கு மாற்று வழிப்பாதையை ஆய்வுசெய்யுமாறு சுப்ரீம் கோர்ட்டு உத்தரவிட்டது. இதற்காக ஆய்வு செய்ய பச்சோரி தலைமையில் சிறப்புகுழு அமைக்கப்பட்டுள்ளது.இந்த குழு ராமேசுவரம் தனுஷ்கோடி, 1, 2, 3, 4 தீடை பகுதிகள், கோதண்டராமர் கோவில் கடல்பகுதியை ஆய்வு செய்தனர். பின்னர் மாற்று வழிப்பாதை குறித்த அறிக்கையை சுப்ரீம் கோர்ட்டில் ஒப்படைத்தனர்.

இந்த நிலையில் இந்திய அரசின் மத்திய கப்பல் போக்குவரத்து துறை செயலாளர் மோகன்தாஸ், தூத்துக்குடி வ.உ.சிதம்பரனார் துறைமுக பொறுப்புக்கழக தலைவர் சுப்பையா ஆகியோர் ராமேசுவரம் வந்தனர். பின்னர் மத்திய கப்பல் போக்குவரத்து துறை செயலாளர் மோகன்தாஸ் நிருபர்களிடம் கூறியதாவது:-

சேது சமுத்திர திட்டம் தொடர்பான வழக்கு சுப்ரீம் கோர்ட்டில் நடந்து வருகிறது. எனவே அந்த திட்டம் தொடர்பாக எந்த கருத்தையும் கூறமுடியாது. மாற்று வழிப்பாதை குறித்தும் கருத்து கூற இயலாது. ராமேசுவரம்-தலைமன்னார் இடையே கப்பல் போக்குவரத்து தொடங்குவது குறித்து மத்திய அரசு பரிசீலனை செய்து வருகிறது.

இதுகுறித்து இலங்கை அரசும், மத்திய அரசு மூலம் தமிழக அரசும் பேசி உறுதியான முடிவு எடுக்கவேண்டும். தூத்துக்குடி-கொழும்பு கப்பல் போக்குவரத்து ஒருசில மாற்றம் செய்யப்பட்டு விரைவில் தொடங்கும்.இவ்வாறு அவர் கூறினார்.

வ.உ.சிதம்பரனார் பொறுப்புக்கழக தலைவர் சுப்பையா கூறியதாவது:-

இந்திய-இலங்கை கப்பல் போக்குவரத்து குறித்த ஒப்பந்தத்தில் ராமேசுவரம்-தலைமன்னார் இடையே கப்பல் போக்குவரத்தும் பரிசீலனையில் இருந்து வருகிறது.தனுஷ்கோடி, அரிச்சல்முனை கடற்கரை பகுதிகளை பார்வையிட உள்ளோம்.

தூத்துக்குடி-கொழும்பு கப்பல் ஆயிரத்து 40 பேர் பயணம் செய்யும் விதத்தில் வடிவமைக்கப்பட்டது. இதில் மாற்றம் செய்து 500 பேர் பயணம் செய்யும் வகையில் சிறிய கப்பல் போக்குவரத்து தொடங்கும்.

இவ்வாறு அவர் கூறினார்.

பின்னர் அவர்கள் மண்டபம் கடலோர காவல் படை முகாமுக்கு சென்று ஹோவர் கிராப்ட் கப்பல் மூலம் சேது சமுத்திர மாற்றுவழி திட்ட பாதைகளை பார்வையிட்டு ஆய்வு செய்தனர்.