சரியான கேலிக்கூத்து

ஜார்கண்ட் மாநிலத்தில் மீண்டும் ஒரு அரசியல் கேலிக்கூத்து அரங்கேறி இருக்கிறது. அந்த மாநிலம் உருவாகி 12 ஆண்டு ஆகிறது. அதற்குள் 8 அரசுகள் கவிழ்ந்துள்ளன.
தடுக்க முடியாத குற்றங்களை சட்ட ரீதியாக அங்கீகரிக்கலாம் என்று புதிய சித்தாந்தம் சிலரால் முன்மொழியப்படுகிறது. அதன்படி ஜார்கண்டில் அரசின் ஆயுளை ஒரு வருடமாக்கி விடலாம். சிபு சோரன், மது கோடா, அர்ஜுன் முண்டா மாறிமாறி நாற்காலியில் உட்காரலாம்.
ஜேஎம்எம் என்கிற ஜார்கண்ட் முக்தி மோர்ச்சா ஆதரவை விலக்கிக் கொண்டதால், பாரதிய ஜனதா தலைமையிலான அரசு கவிழ்கிறது. முக்தி என்றால் விடுதலை. மோர்ச்சா என்றால் படை. ஆனால் ஜார்கண்டுக்கு முக்தி கிடைக்காமல் அமுக்கிக் கொண்டிருப்பது ஜேஎம்எம்தான். அதன் தலைவர் வனவாசி சோரன். 3 முறை முதல்வராக இருந்தவர். அவர் கவிழ்த்த முண்டாவும் 3 முறைஅனுபவித்தவர். கோடா மாராண்டி தலா 1 தடவை.
அனைவர் மீதும் ஏராளமான ஊழல்புகார்கள். எல்லாம் ஆயிரம் கோடிகளில். பார்த்தால் ஒரே ஒரு பசு வளர்ப்பவர் போல அவ்வளவு எளிமை. ஐந்தாண்டுக்கு தேர்ந்து எடுக்கப்பட்ட அரசு அதிகபட்சம் பதவி வகித்தது 29 மாதம். குறைந்தபட்சத்தில் கவிழ்ந்த அரசின் ஆயுள் 11 நாள். காங்கிரசும் பாரதிய ஜனதாவும் ஜார்கண்ட் தன்வசமென காட்டிக் கொள்ள போட்டியிடுகின்றன. ஆனால் வனவாசி சொன்னதுதான் நடக்கும். அதனால் தேசிய கட்சிகள் கூச்சமின்றி வளைந்து கொடுக்கின்றன.
எந்த கூட்டணியில் இருக்கிறோம் என்பதையே மறந்து சட்டசபையில் ஓட்டு போடுகிறார்கள் என்றால் அதற்கு மேல் சொல்ல என்ன இருக்கிறது. இந்த கூத்தில் கவர்னருக்கும் ஒரு பாத்திரம் நிச்சயம். அரசமைப்பு சட்ட விதிகள், மரபுகள் காற்றாடியாக ஒட்டப்பட்டு மாஞ்சா தடவிய நூலில் உயர உயர பறக்கும். டீல்தான், வேறென்ன.
மத்தியில் ஆளும் கட்சியின் நூல் அறுந்தால் ஜனாதிபதி ஆட்சி பிரகடனம் ஆகும். வெட்டுண்டது ஜனநாயகத்தின் கழுத்து என்று மாற்றுக் கட்சி கதறும். பலமுறை பார்த்துவிட்டோம். எந்த கட்சியும் தனது அணுகுமுறையை மாற்றிக் கொள்ள தயாராக இல்லை. 18 மாவட்டங்களாக மீண்டும் பிகாருடன் சேர்த்தால்தான் விமோசனம் கிட்டும் போலிருக்கிறது. தெலங்கானா பிரிந்தபின் என்ன நடக்கும் என்று வேடிக்கை பார்க்கவும் ஆவலாக இருக்கிறதோ?
:-
தினகரன்

உண்மையில் கேலிக்கூத்துத◌ான்

:!.: :!.: