புதிய பாப்பரசர் தேர்வுக்கான கர்தினால்களின் இரகசிய அமர்வு ஆரம்பம்

புதிய பாப்பரசர் தேர்வுக்கான கர்தினால்களின் இரகசிய அமர்வு ஆரம்பம்
வத்திக்கான் வெளியுலக தொடர்பிலிருந்து துண்டிப்பு
முன்னணி போட்டியாளர் யார் என்பது தெரியாத நிலையில் புதிய பாப்பரசரை தேர்வு செய்வதற்கான கர்தினால்களின் இரகசிய கூட்டம் நேற்று வத்திக்கானில் ஆரம்பமானது.

சென்பீட்டர்ஸ் பஸ்லிக்காவில் இடம்பெற்ற விசேட ஆராதனையைத் தொடர்ந்து புதிய பாப்பரசரை தேர்வு செய்யும் 115 கர்தினால்களும் இரகசிய கூட்டத்தை ஆரம்பித்தனர். வத்திக்கான் நேரப்படி நேற்று மதியம் பாப்பரசர் தேர்வுக்கான முதலாவது வாக்கெடுப்பு இடம்பெறவிருந்தது.

மைக்கல் ஆஞ்சலோவின் வரலாற்று பிரசித்தி பெற்ற ஓவியம் அமைந்திருக்கும் சிஸ்டின் செப்பல் மண்டபத்திலேயே கர்தினால்களின் இரகசிய கூட்டம் இடம்பெற்று வருகிறது. இதில் கர்தினால்கள் பாப்பரசர் தேர்வுக்கு தேவையான மூன்றில் இரண்டு வாக்குகளும் கிடைக்கப்பெறும் வரை நாளாந்தம் தளா நான்கு தடவைகள் வாக்குப் பதிவில் ஈடுபடவுள்ளனர்.

பரிசுத்த பாப்பரசர் 16 ஆம் ஆசிர்வாதப்பர் திடீரென இராஜினாமா செய்ததையடுத்தே புதிய பாப்பரசரை தேர்வு செய்யும் செயற்பாட்டில் வத்திக்கான் ஈடுபட்டுள்ளது. 85 வயதான 16 ஆம் ஆசிர்வாதப்பர் தனது வயதை காரணமாக கூறியே கடந்த மாதம் இராஜினாமா செய்தார்.

இந்நிலையில் நேற்றுக் காலை புதிய பாப்பரசரை தேர்வு செய்யும் கர்தினால்கள் சென்பீட்டர்ஸ் பஸ்லிக்காவில் ஒன்று கூடி விசேட ஆராதனையில் ஈடுபட்டனர். கர்தினால்களின் கல்லூரி பீடாதிபதியான அன்ஜலோ சொடனொ இந்த விசேட ஆராதனையை நடத்தினார். அதில் இரகசிய கூட்டத்தில் பங்கேற்கும் ஒவ்வொருவரும் திருச் சபையின் ஒற்றுமையை கட்டியெழுப்ப பாடுபட வேண்டும் என வலியுறுத்தினார்.

சென்பீட்டர்ஸ் பஸ்லிக்காவில் இடம்பெற்ற ஆராதனையை அங்கு கூடிய ஆயிரக்கணக்கான யாத்திரிகர்கள் சென் பீட்டர்ஸ் சதுக்கத்தில் நான்கு பிரமாண்ட திரைகளூடாக பார்வையிட்டனர். விசேட ஆராதனையைத் தொடர்ந்து வத்திக்கான் வளாகம் வெளியுலக தொடர்புகளை துண்டித்துக் கொண்டது. குறிப்பாக கர்தினால்களின் இரகசியக் கூட்டம் இடம்பெறும் சிஸ்டின் செப்பல் மண்டபத்தில் இலத்திரனியல் தொடர்பு கருவிகள் அனைத்தும் செயலிழக்கப்பட்டன.

இதில் இலங்கை நேரப்படி இரவு 10 மணி அளவில் ஆரம்பமான கர்தினால்களின் இரகசிய கூட்டத்தின் முதல் நாளில் மதிய வேளையில் முதல் வாக்கெடுப்பு நடைபெறவிருந்தது. முதல் வாக்கெடுப்பில் உறுதியான முடிவு கிடைக்காது என கூறப்பட்டிருந்தது. இதனைத் தொடர்ந்து இன்றைய தினத்தில் வத்திக்கான் நேரப்படி காலையில் இரு வாக்குகளும் மதியத்தில் இரு வாக்குகளும் பதியப்படவுள்ளன. வாக்கெடுப்புகளுக்கு பின்னர் வாக்குச் சீட்டுகள் எரிக்கப்பட்டு விசேடமாக அமைக்கப்பட்ட புகைக் குழாய் ஊடாக வெளியிடப்படவுள்ளது. இதில் கறுப்புப் புகை வெளியானால் பாப்பரசர் தேர்வில் இழுபறி நீடிப்பது என அறிவிக்கப்படு வதோடு வெள்ளை புகை வெளியானால் புதிய பாப்பரசர் தேர்வாகிவிட்டதாகவும் அறிவிக்கப்படும். எவ்வாறாயினும் ஒருசில தினங்களுக்குள் புதிய பாப்பரசர் தேர்வாவதற்கான மூன்றில் இரண்டு வாக்குகளும் கிடைக்கும் என வத்திக்கான் நம்பிக்கை தெரிவித்துள்ளது. புதிய பாப்பரசர் தேர்வில் பங்கேற்கும் 115 கர்தினால்களில் இருந்தே பாப்பரசர் தேர்வாகவுள்ளார். இதில் ஒவ்வொரு கர்தினால்களும் வாக்குப் பதிவின் போது தமக்கு வாக்களிக்கக் கூடாது என நிபந்தனை விதிக்கப்பட்டுள்ளது. எனினும் புதிய பாப்பரசர் போட்டிக்கு முன்னணியில் இருப்பவர் குறித்து தெளிவு இல்லை என சர்வதேச ஊடகங்கள் குறிப்பிட்டுள்ளன.

தினகரன்.