மக்களைச் சென்றடையாத காப்பீட்டுத் திட்டங்கள்: விழிப்புணர்வு இல்லாததால் வீணாகிறது.

மதுரை : மத்திய அரசின் பொதுத் துறை காப்பீட்டு நிறுவனங்களின், சிறப்பான
காப்பீட்டுத் திட்டங்கள் குறித்த விழிப்புணர்வை ஏற்படுத்தாததால், அவை
மக்களைச் சென்றடையாமல் வீணாகிறது.

பொதுத்துறை நிறுவனங்களைப்
பொறுத்தவரை, வாகனங்களுக்கான காப்பீடு செய்வது மட்டும் வழக்கமான விஷயமாக
உள்ளது. வீட்டிற்கான காப்பீடு, "தீத்தடுப்பு',வீட்டில் உள்ள "எலக்ட்ரானிக்,
எலக்ட்ரிக்கல்' பொருட்கள், "பர்னிச்சர்', கண்ணாடி ஜன்னல், "டிவி',
கம்ப்யூட்டர், பெடல் சைக்கிள், வெளியூர் செல்லும் போது "லக்கேஜ்'
அனைத்திற்கும் காப்பீடு செய்யலாம். இதற்கான காப்பீட்டுத் தொகையும் குறைவு
தான்.தீயினால் ஏற்படும் விபத்திற்கு காப்பீடு செய்ய, ஆயிரம் ரூபாய்க்கு 35
காசு, பொருட்களை காப்பீடு செய்ய 35 காசு, நகை மற்றும் விலை மதிப்பில்லா
பொருட்களுக்கு 10.50 ரூபாய், கண்ணாடி ஜன்னல்களுக்கு 10 ரூபாய்,
எலக்ட்ரானிக் பொருட்களுக்கு 10 ரூபாய் வீதம் தொகை வசூலிக்கப்படுகிறது.

மூன்று
வித காப்பீடு, சேர்த்து எடுக்க வேண்டியது கட்டாயம். நான்கு வித காப்பீடு
செய்தால், பிரீமியத் தொகையில் 15 சதவீத தள்ளுபடி. ஆறு வித காப்பீடு
செய்தால், 20 சதவீத தள்ளுபடி வழங்கப்படுகிறது. ஓராண்டுக்குள் அசம்பாவிதம்
நடந்தால், பிரிமீயத் தொகைக்கேற்ப, அதற்கான தொகை வழங்கப்படும். ஆண்டுக்கு
ஒருமுறை காப்பீட்டுத் தொகை செலுத்த வேண்டும்.அதிகபட்சம் லட்ச ரூபாய்
மதிப்புள்ள பொருட்களுக்கு ரூ.35 முதல் ரூ.100 வரையே வசூலிக்கப்படுகிறது.
ஆனாலும் இதுகுறித்து விழிப்புணர்வு இல்லை. தனிநபர் விபத்து காப்பீட்டு
திட்டமும் அப்படித் தான். ஒரு லட்ச ரூபாய்க்கு ரூ.60 காப்பீட்டுத் தொகை
செலுத்தினால் போதும். ஓராண்டுக்குள் அசம்பாவிதம் நடந்தால், குடும்பத்திற்கு
ரூ.ஒருலட்சம் வழங்கப்படும்.

"மெடிகிளைம்' திட்டத்தைப் பொறுத்தவரை,
ரூ.ஒருலட்சம் காப்பீடு செய்ய, ஓராண்டுக்கு ரூ.220 செலுத்த வேண்டும்.
விபத்தில் இறந்தால் ரூ.ஒரு லட்சம் வழங்கப்படும். மருத்துவமனையில் சிகிச்சை
பெற நேர்ந்தால், ரூ.ஒரு லட்ச காப்பீட்டுக்கு மாதம் ரூ.1000 வீதம்,
தொடர்ந்து இரண்டாண்டுகளுக்கு உதவித்தொகை வழங்கப்படும். ரூ. 4 லட்சம் வரை
காப்பீடு செய்து, சிகிச்சையில் இருந்தால், மாதத்திற்கு அதிகபட்சமாக ரூ.3000
வரை வழங்கப்படும்.மக்களிடம் சரியான முறையில் விளம்பரப்படுத்தாததால் தான்,
இக்காப்பீட்டுத் திட்டங்கள் மக்களைச் சென்றடையவில்லை. இதனால் லாபம் பெறுவது
தனியார் காப்பீட்டு நிறுவனங்கள். பொதுத்துறையில் நான்கு நிறுவனங்களிலும்
உள்ள காப்பீட்டுத் திட்டங்களை மக்களிடம் அறிமுகப்படுத்த, மத்திய அரசு
முன்வர வேண்டும்.

நன்றி:தினமலர்