புதுக்கோட்டை மீனவர்கள் மீது இலங்கை கடற்படை தாக்குதல்

புதுக்கோட்டை, மார்ச். 18-

தமிழக மீனவர்கள் மீது சமீப காலமாக இலங்கை கடற்படையினர் கொலை வெறி தாக்குதல் நடத்தி வருகிறார்கள். குறிப்பாக ஈழத்தமிழர் பிரச்சினையில் இலங்கைக்கு எதிராக ஐ.நா. சபையில் அமெரிக்கா கொண்டுவர உள்ள தீர்மானத்தை இந்தியா ஆதரிக்க வலியுறுத்தி தமிழகத்தில் போராட்டம் வலுத்து வருகிறது.

இதனால் ஆத்திரம் அடைந்த இலங்கை கடற்படை வீரர்கள் நேரடி தாக்குதல் நடத்த முடியாமல் கடலுக்கு செல்லும் தமிழக மீனவர்கள் மீது அவ்வப்போது தாக்குதல் நடத்தியும், சிறைபிடித்தும் வருகின்றனர். இந்தநிலையில் புதுக்கோட்டை மாவட்டம் கோட்டைப்பட்டினம் அருகே உள்ள புதுக்குடி மீனவ கிராமத்தை சேர்ந்த ராமன் என்பவருக்கு சொந்தமான பைபர் படகில் பூமிநாதன், சகோதரர்களான ராமன், லட்சுமணன் ஆகிய 3 பேரும் நேற்ற காலை கடலுக்கு மீன் பிடிக்க சென்றனர்.

இரவில் அவர்கள் இந்திய கடல் எல்லையான பாக் ஜலசந்தி பகுதியில் வலைகளை விரித்து மீன் பிடித்துக்கொண்டு இருந்தனர். அப்போது அங்கு குட்டி ரோந்து கப்பலில் இலங்கை கடற்படையினர் வந்தனர். அவர்களை பார்த்ததும் மீனவர்கள் வலைகளை சுருட்டிக்கொண்டு அங்கிருந்து புறப்பட தயாரானார்கள்.

ஆனால் படகை சுற்றிவளைத்த இலங்கை கடற்படையினர் பைபர் படகில் தாவி 3 மீனவர்களையும் கண்மூடித்தனமாக தாக்கினர். மேலும் வலைகளை அறுத்து கடலில் வீசியதோடு, படகில் இருந்த டீசலையும் கடலில் கொட்டினர்.

அத்துடன் மீனவர்கள் பிடித்து வைத்திருந்த மீன்களையும் பறித்துக் கொண்டு அங்கிருந்து சென்றனர். உடல் முழுவதும் ரத்த காயங்களுடன், படகையும் இயக்க முடியாமல் 3 மீனவர்களும் நடுக்கடலில் தத்தளித்தனர். நள்ளிரவு நேரம் அந்த வழியாக வந்த மற்ற மீனவர்கள் காயம் அடைந்த 3 பேரையும் காப்பாற்றி இன்று காலை கரை சேர்த்தனர்.

படுகாயம் அடைந்த மீனவர்கள் 3 பேரும் மணமேல்குடி அரசு ஆஸ்பத்திரியில் அனுமதிக்கப்பட்டு சிகிச்சை பெற்று வருகிறார்கள். இது பற்றி அவர்கள் கொடுத்த புகாரின் பேரில் மணமேல்குடி போலீசார் வழக்குப்பதிவு செய்துள்ளனர்.

அநியாயமாக தாக்கப்படும் மீனவர்களுக்கு அரசு சரியான நடவடிக்கை எடுக்க வேண்டும் :#.: