செவ்வாய் கிரகத்திற்கு பயணம் - சிறுநீரையே தண்ணீராக குடிக்க வேண்டும்..?

சூரிய மண்டலத்தின் சிகப்பு கிரகம் என்றழைக்கப்படும் செவ்வாய் கிரகத்திற்கு திருமணமான ஒரு ஜோடியை அனுப்புவதற்கான திட்டத்தை அமெரிக்க பணக்கராரன டென்னிஸ் டிட்டோ அறிமுகம் செய்துள்ளார். இவர் 2001-ம் ஆண்டு முதல் முதலாக விண்வெளிக்கு சென்று வந்த சுற்றுலாப்பயணி ஆவார்.

முதல் முறையாக செவ்வாய் கிரகத்திற்கு மனிதர்களை அனுப்பும் திட்டம் 2018-ம் ஆண்டு செயல்படுத்தப்பட உள்ளது. செவ்வாய் கிரகத்தை சுற்றி வர கிரகங்களிடையேயான இந்த பயணம் 501 நாட்கள் ஆகும். இதில் பயணம் செய்வதற்கு ஒரு ஜோடி தேர்வு செய்யப்பட உள்ளது.

டிட்டோவின் இந்த அறிவிப்பை அடுத்து, விண்வெளி பற்றி ஆர்வம் உள்ள ஏராளமானோர் விண்ணப்பங்கள் அனுப்பி வருகின்றனர். இவர்களில் தேர்ந்தெடுக்கப்படும் ஜோடியானது, பொழுதுபோக்கு அம்சங்களுடன் கூடிய ஒரு விண்வெளி கலத்தில் ஒரு வருடத்திற்கு மேலாக சூரிய மண்டலத்தின் வழியாக செவ்வாய் கிரகத்திற்கு பயணம் மேற்கொள்வார்கள்.

இந்த கிரகங்களிடையேயான பயணத்தின் போது, நீர்ச்சத்து குறைந்த திட உணவை சாப்பிடுவதுடன், சுத்திகரிக்கப்பட்ட அவர்களின் சிறுநீரையே தண்ணீராக குடிக்க வேண்டும். மறுசுழற்சி முறையில் காற்றை சுவாசிக்க வேண்டும்.

தைரியமான இந்த பயணத்திற்கு ஆர்வலர்களிடமிருந்து ஆயிரக்கணக்கான விண்ணப்பங்கள் வந்துள்ளதாக மார்ஸ் குழுவினர் தெரிவித்துள்ளனர்.