ரத்த புற்றுநோயை குணப்படுத்தும் மருந்து: இலவசமாக வழங்க ராஜஸ்தான் அரசு திட்டம்

ஜெய்பூர், ஏப்ரல் 21:-

சுவிட்சர்லாந்தின் மருந்து தயாரிப்பு நிறுவனமான நோவார்டிஸ், ரத்தப் புற்றுநோய்க்கான மாத்திரையின் காப்புரிமையைப் புதுப்பித்து, இந்தியாவில் தயாரிக்கப்படும், இதற்கு இணையான மருந்தினைத் தடை செய்யக் கோரி, இந்திய நீதிமன்றத்தில் வழக்குத் தொடர்ந்திருந்தது. ஆனால் அவ்வழக்கில் இந்த நிறுவனம் தோல்வியைத் தழுவ நேரிட்டது.

நோவார்டிஸ் நிறுவனத்தின் ரத்தப் புற்றுநோய்க்கான 30 மாத்திரைகள், 1.23 லட்சத்திற்கு விற்கப்படுகின்றது. இதனை, வாழ்நாள் முழுவதும் அந்த நோயாளிகள் பயன்படுத்தவேண்டும். ஆனால், அதன் இந்தியத் தயாரிப்பு, அனைவரும் வாங்கக்கூடிய விலையில் கிடைக்கின்றது. எனவே, உச்ச நீதிமன்றம் பொதுமக்கள் நலன் கருதி உள்ளூர் நிறுவனத்தின் விற்பனையை தடை செய்ய மறுத்துவிட்டது.

இந்த நிலையில், தற்போது ராஜஸ்தான் மாநில அரசு, ரத்தப்புற்று நோயால் அவதிப்படுவோர்களுக்கு தேவையான மாத்திரைகளை இலவசமாக அளிக்க முன்வந்துள்ளது. கடந்த 2011ஆம் ஆண்டு, அக்டோபர் மாதம் முதல் செயல்படத் துவங்கியுள்ள ராஜஸ்தான் மாநில முதலமைச்சரின் இலவச மருத்துவ உதவித் திட்டத்தின் கீழ், ஏற்கனவே, 25 விதமான புற்றுநோய்க்கான மருந்துகள் வழங்கப்படுகின்றன.

தற்போது, ரத்தப் புற்றுநோயினையும் சேர்த்து மேலும் 14 வகை மருந்துகள் வழங்கப்படும் என்று அரசு அறிவித்துள்ளது. எளிய மக்களுக்கு உதவும் விதத்திலேயே இந்தத் திட்டம் ஆரம்பிக்கப்பட்டுள்ளது. இந்த மருந்துகளை வழங்குவதற்காக ஏல முறைப்படி மருந்து நிறுவனத்தை தேர்வு செய்யுள்ளதாகவும், ஏற்கனவே ஐந்து மருந்து தயாரிப்பு நிறுவனங்கள் விண்ணப்பம் அளித்துள்ளதாகவும், அரசு மருத்துவ ஆணையத்தின் நிர்வாகத் தலைவர் சமித் சாமா குறிபிட்டுள்ளார்.

மாலைமலர்