இந்திய மாணவர்களின் கெளரவத்துக்கு அமெரிக்க குடியேற்றத்துறை உறுதி

by **நண்பன்** Fri 4 Feb 2011 - 15:50

டிரிவேலி பல்கலைக்கழக விவகாரத்தில் இந்திய மாணவர்களைக் கவுரவமாக நடத்துவதாக அமெரிக்க குடியேற்றத்துறை உறுதியளித்துள்ளது. இதற்கிடையில் அங்குள்ள இந்திய தூதரகம், மாணவர்களுக்கு இலவச சட்ட ஆலோசனை வழங்கப்போவதாக அறிவித்துள்ளது.

அமெரிக்காவின் கலிபோர்னியா மாகாணத்தில் உள்ள டிரிவேலி பல்கலை விவகாரத்தில் இந்திய மாணவர்களின் கால்களில் “எலக்ட்ரானிக் டேக்” எனப்படும் கருவியைக் கட்டி விட்டுக் கண்காணிப்பதற்கு இந்தியா கடும் கண்டனம் தெரிவித்திருந்தது.

தொடர்ந்து அமெரிக்காவுக்கான இந்திய தூதர் மீரா சங்கர் அமெரிக்க குடியேற்றத்துறையிடம் இந்தியாவின் எதிர்ப்பை வலியுறுத்தினார்.

இதையடுத்து இவ்விவகாரத்தை கவனமாகக் கையாள்வதாகவும், நேர்மையான முறையில் வழக்கை நடத்தி நியாயம் அளிப்பதாகவும், அமெரிக்க குடியேற்றம் மற்றும் சுங்கவரி அமுலாக்கத்துறை இயக்குனர் ஜான் மார்ட்டன் மீரா சங்கரிடம் உறுதியளித்துள்ளார்.

இந்நிலையில் சென் பிரான்சிஸ் கோவில் உள்ள இந்திய தூதரகமும், தெற்காசிய சட்டத்தரணிகள் கூட்டமைப்பும் இணைந்து டிரிவேலி பல்கலைக்கழக வழக்கில் சிக்கியுள்ள இந்திய மாணவர்களுக்கு இலவச சட்ட ஆலோசனை வழங்கப் போவதாக அறிவித்துள்ளன. சென்பிரான்சிஸ் கோவில் உள்ள இந்திய தூதரகத்தில் வரும் 5ம் திகதி இந்த ஆலோசனை நடக்க உள்ளது.