பெரம்பலூர் அருகே கொள்ளையனை அடித்து கொன்ற பொதுமக்கள்

by *சம்ஸ் Tue 23 Apr 2013 - 7:31

பெரம்பலூர், ஏப். 23-

பெரம்பலூர் மாவட்டம் குன்னம் அருகே உள்ள மருவத்தூர் போலீஸ் சரகத்திற்கு உட்பட்டது கல்பாடி எறையூர் கிராமம். இப்பகுதியை சேர்ந்த பொதுமக்கள் பெரும்பாலும் விவசாயம் மற்றும் கூலித்தொழிலை நம்பியே பிழைப்பு நடத்தி வருகிறார்கள். இந்தநிலையில் நேற்று நள்ளிரவு 12 மணி முதல் 1 மணி வரை அப்பகுதியில் மின்தடை ஏற்பட்டது.

அப்போது அதே கிராமத்தை சேர்ந்த வேல்முருகன் (வயது 33), முருகேசன் (35), ராஜாராம் (25), பால்ராஜ் (20) ஆகிய 4 பேரும் காற்றுக்காக அங்குள்ள மேல்நிலை நீர்தேக்க தொட்டியின் கீழ் அமர்ந்து பேசிக்கொண்டிருந்தனர். அந்த சமயம் கிராமத்திற்குள் ஒரு மோட்டார் சைக்கிள் வந்தது. அதில் அடையாளம் தெரியாத 3 பேர் வந்தனர்.

உடனே சந்தேகத்தின் பேரில் அவர்களை வழிமறித்து நிறுத்திய வேல்முருகன் உள்பட 4 பேரும் யார் நீங்கள், எங்கு செல்கிறீர்கள்? என்று விசாரித்தனர். அதற்குள் மோட்டார்சைக்கிளில் பின்னால் அமர்ந்து வந்த 2 பேர் இறங்கி ஓட்டம் பிடித்தனர். வண்டியை ஓட்டி வந்தவர் மட்டும் சிக்கினார்.

அவரிடம் விசாரித்தபோது பெரம்பலூர் அருகே உள்ள துறைமங்கலத்தை சேர்ந்த வடிவேல் (40) என்பது தெரிய வந்தது. தொடர்ந்து அவர் முன்னுக்குப்பின் முரணான தகவல்களை கூறினார். வாகனத்தை சோதனை போட்ட போது அதில் மிளகாய் பொடி, கத்தி, அரிவாள், இரும்பு கம்பிகள், வயர் உள்ளிட்டவை இருந்தன.

இதையடுத்து அவர்கள் கொள்ளையர்கள் என்பதை கிராமத்தினர் உறுதி செய்தனர். பின்னர் கிராமத்தை சேர்ந்த 4 பேரும் சேர்ந்து பிடிபட்ட வடிவேலை அங்குள்ள மின் கம்பத்தில் கட்டி வைத்து சரமாரியாக தாக்கினர். அத்துடன் கிராம மக்களும் திரண்டு வந்து தாக்கியதாகவும் கூறப்படுகிறது.

இதில் அவர் சம்பவ இடத்திலேயே இறந்தார். இதுபற்றிய தகவல் மாவட்ட போலீஸ் சூப்பிரண்டு செந்தில்குமாருக்கு தெரிவிக்கப்பட்டது. அவரது உத்தரவுப்படி பெரம்பலூர் துணை போலீஸ் சூப்பிரண்டு சுகாசினி மற்றும் மருவத்தூர் போலீசார் சம்பவம் நடந்த இடத்துக்கு விரைந்து சென்றனர்.

அங்கு பிணமாக கிடந்த வடிவேலுவின் உடலை கைப்பற்றி பெரம்பலூர் அரசு ஆஸ்பத்திரிக்கு பிரேத பரிசோதனைக்காக அனுப்பி வைத்தனர். இதுதொடர்பாக கொலை வழக்கு பதிவு செய்த மருவத்தூர் போலீசார் வேல்முருகன், முருகேசன், ராஜாராம், பால்ராஜ் ஆகிய 4 பேரையும் பிடித்து விசாரணை நடத்தி வருகிறார்கள்.

மேலும் தப்பி ஓடிய கொள்ளையர்கள் 2 பேரையும் தேடி வருகின்றனர். இந்த சம்பவம் அப்பகுதியில் பெரும் பரபரப்பை ஏற்படுத்தி உள்ளது.

மாலைமலர்