பங்களாதேசில் ஆர்ப்பாட்டக்காரர்களுக்கும் பொலிஸாருக்கும் இடையில் மோதல்; 22 பேர் பலி

ஆர்ப்பாட்டக்காரர்களுக்கும்பொலிஸாருக்கும் இடையில் மோதல்;: 22 பேர் பலி
இஸ்லாமிய கொள்கையை கடைபிடிக்க அரசுக்கு அழுத்தம்
பங்களாதேஷில் இஸ்லாமிய ஆதரவாளர்களுக்கும் பொலிஸாருக்கும் இடையில் ஏற்பட்ட மோதலில் 22 பேர் கொல்லப்பட்டுள்ளனர்.

தலைநகர் டாக்காவில் ஞாயிற்றுக்கிழமை இடம்பெற்ற கலவரத்தின் போது ஆர்ப்பாட்டக்காரர்களை கலைக்க பொலிஸார் கண்ணீர் புகைப் பிரயோகம் மேற்கொண்டதோடு ரப்பர் குண்டுகளையும் பயன்படுத்தினர். ஹபாஸத் இ இஸ்லாம் அமைப்பி னாலேயே இந்த ஆர்ப்பாட்டம் ஏற்பாடு செய்யப்பட்டிருந்தது. ஞாயிற்றுக்கிழமை கலவரமாக மாறிய ஆர்ப்பாட்டம் நேற்று திங்கட்கிழமையும் நகரின் பல பகுதிகளிலும் தொடர்ந்து நீடித்தது.

இஸ்லாமிய கொள்கைகளை நடைமுறைப்படுத்தக் கோரி ஆயிரக்கணக்கான இஸ்லாமிய ஆதரவாளர்கள் தலைநகரில் கூடினர். இதன் போது பல கடைகள் மற்றும் வாகனங்களுக்கு ஆர்ப்பாட்டக்காரர்கள் தீமூட்டினர்.

டாக்கா நகரின் வர்த்தக பகுதியான மொதிஸ்ஹிலாலை ஆர்ப்பாட்டக்காரர்கள் ஆக்கிரமித்தனர். எனினும் இந்த பகுதி முழுமையாக தமது கட்டுப்பாட்டுக்குள் வந்துவிட்டதாக பொலிஸார் திங்கட்கிழமை காலை அறிவித்தனர். அங்கு மறைந்திருக்கும் ஆர்ப்பாட்டக்காரர்களை தேடி கட்டடங்களில் சோதனைகளில் ஈடுபட்டிருப்பதாகவும் பொலிஸார் கூறினர்.

டாக்கா மத்தியில் இருக்கும் மிகப்பெரிய பள்ளிவாசலை ஒட்டி இடம்பெற்ற கலவரத்தால் அந்த பகுதியே யுத்த களமாக மாறியிருந்தது. ஆர்ப்பாட்டக் காரர்கள் பொலிஸாரை நோக்கி கற்களை எறிந்து தாக்குதல் நடத்தினர். இதனைத் தொடர்ந்து ஆர்ப்பாட்டக் காரர்களை கலைக்க பொலிஸார் தடியடிப் பிரயோகம் மேற்கொண்டதோடு கண்ணீர் புகைக் குண்டுகள், ரப்பர் குண்டுகளை பிரயோகித்தனர்.

“மொதிஸ்ஹிலால் பகுதியில் சட்டவிரோதமான முறையில் அவர்கள் ஒன்று கூடி இருந்ததால் நாம் கடுமையாக நடவடிக்கை எடுக்க வேண்டி ஏற்பட்டது” என குறிப்பிட்ட பொலிஸ் பேச்சாளர் மசுதுர் ரஹ்மான், “அவர்கள் எம்மீது கற்கள், மூங்கில் கம்புகள், செங்கட்களால் தாக்கினர்” என்றார்.

டாக்காவின் புறநகர் பகுதியான கன்ச்பூரிலும் மோதல் வெடித்தது. இங்கு நடந்த வன்முறையில் இரு பொலிஸார், பாதுகாப்பு வீரர் உட்பட ஆறு பேர் கொல்லப்பட்டனர்.

அதேபோன்று ஆர்ப்பாட்டக்காரர்கள் டாக்காவுக்கான பிரதான பாதையை மூடி தலைநகரின் செயற்பாடுகளையும் முடக்கினர். இந்த ஆர்ப்பாட்டத்தில் பங்கேற்க பஸ், லொறி, மினி பஸ் என குறைந்தது 3000 வாகனங்கள் மூலம் தலைநகருக்கு ஆர்ப்பாட்டக்காரர்கள் அழைத்து வரப்பட்டதாகவும் ஏனையோர் பொதுப் போக்குவரத்து வாகனங்கள் மூலம் தலைநகரை வந்தடைந்திருந்ததாகவும் டாக்காவின் டெய்லி ஸ்பீடார் நாளிதழ் செய்தி வெளியிட்டுள்ளது. தலைநகரில் உள்ள ஆறு பாதைகளூடாக “அல்லாஹு அக்பர்”, “ஒரு குறிக்கோள்! ஒரு இலக்கு! நாத்திகர்கள் தூக்கிலிடப்பட வேண்டும்” என கோஷமெழுப்பி ஊர்வலமாக வந்த ஆர்ப்பாட்டக்காரர்கள் மொதிஸ்ஹிலால் பகுதியில் ஒன்று திரண்டனர்.

ஹபாஸத் இஸ்லாம் அமைப்பு இஸ்லாமிய வழிகாட்டலை தீவிரமாக கடைப்பிடிக்க அழுத்தம் கொடுத்து வருகிறது. நாட்டிலுள்ள மத்ரசாக்கள் அல்லது மதப் பாடசாலைகளில் இந்த அமைப்புக்கு பெரும் ஆதரவு உள்ளது.

நாட்டில் இருக்கும் பெண்கள் அமைப்புகள் தொடர்பில் எதிர்ப்பை வெளியிட்டு வரும் ஷபாஸத் இ இஸ்லாம், தேசிய அபிவிருத்தி கொள்கையில் பெண்களின் நிலை குறித்தும் எதிர்ப்பை வெளியிட்டுள்ளது.

பங்களாதேஷ் அரசு, பங்களாதேஷை ஒரு மதச்சார்பற்ற ஜனநாயக நாடாக குறிப்பிட்ட போதும் அதனை நிராகரிக்கும் ஹபாஸ்த் இ இஸ்லாம், மத நிந்தனைக்கு எதிராக சட்டம் கொண்டுவர அழுத்தம் கொடுத்து வருகிறது. ஆனால் தற்போதைய சட்டமே, போதுமானது என பிரதமர் ஷெய்க் ஹஸினா குறிப்பிட்டுள்ளார்.

சுமார் 90 வீதம் முஸ்லிம்களைக் கொண்ட பங்களாதேஷில் அதற்கு அடுத்ததாக ஹிந்துக்கள் பெரும்பான்மையாக உள்ளனர்.

தினகரன்

அங்கு என்ன தான் நடக்கிறது ஒன்றுமே புரிவதில்லையே

நம்மிடம் உள்ள ஒற்றுமை எல்லாம் எங்கே போயிற்று

Muthumohamed wrote:அங்கு என்ன தான் நடக்கிறது ஒன்றுமே புரிவதில்லையே

நம்மிடம் உள்ள ஒற்றுமை எல்லாம் எங்கே போயிற்று

உலகில் எங்கும் ஒற்றுமை இல்லை அழிவின் விளிம்பில்தான் இப்போது நாம் உள்ளோம் #.