ஊழல் புகார்கள் 113 சதவீதம் அதிகரிப்பு : சி.வி.சி., ஆண்டு அறிக்கையில் தகவல்

by **ராகவா** Tue 3 Sep 2013 - 15:28

புதுடில்லி : "ஊழல் முறைகேடு குறித்த புகார்கள், கடந்தாண்டு, 113 சதவீதம் அதிகரித்துள்ளது' என, மத்திய ஊழல் தடுப்பு மற்றும் கண்காணிப்பு ஆணையம் தெரிவித்துள்ளது.

மத்திய அரசு துறைகளில், ரயில்வே துறையில் தான், அதிகளவில், ஊழல் முறைகேடு குறித்த புகார்கள் வந்துள்ளன. இந்த வகையில், கடந்தாண்டு, 10 ஆயிரம் புகார் மனுக்கள் வந்துள்ளன. சி.வி.சி., என்ற மத்திய ஊழல் தடுப்பு மற்றும் கண்காணிப்பு ஆணையம் வெளியிட்டுள்ள, ஆண்டு அறிக்கையில் தெரிவிக்கப்பட்டுள்ளது. இந்த அறிக்கை, சமீபத்தில், பார்லிமென்டில் தாக்கல் செய்யப்பட்டது.

அதில் குறிப்பிடப்பட்டுள்ள அம்சங்கள் வருமாறு:மத்திய ஊழல் தடுப்பு கண்காணிப்பு ஆணையத்திற்கு, 2011ல் ஊழல் முறைகேடுகள் குறித்து வந்த புகார்களின் எண்ணிக்கை, 17 ஆயிரம். கடந்தாண்டில் பெறப்பட்ட புகார்கள், 37 ஆயிரம். முந்தைய ஆண்டுடன் ஒப்பிடும் போது, 113 சதவீதம் புகார்கள் அதிகரித்துள்ளன.இதில், 33 ஆயிரம் புகார்களை, மத்திய ஊழல் கண்காணிப்பு ஆணையம் விசாரித்து, பைசல் செய்துவிட்டது. இன்னும், 3,900 புகார்கள் விசாரணையில் உள்ளன.பெரும்பாலான புகார்கள், நிர்வாக விஷயங்கள் சம்பந்தப்பட்டவையாக, மேலோட்டமாக குறிப்பிடப்பட்டு இருந்தன.பல்வேறு அரசு துறைகளில் செயல்படும் ஊழல் கண்காணிப்பு அதிகாரிகளுக்கு, கடந்தாண்டில், 49 ஆயிரம் புகார்கள் வந்துள்ளன. இதில் அதிகபட்சமாக, ரயில்வே துறையில், 10 ஆயிரம் புகார்கள் வந்துள்ளன. இதற்கு அடுத்தபடியாக, வங்கிகளில், 7,000 புகார்கள் வந்துள்ளன.இவ்வாறு அந்த அறிக்கையில் குறிப்பிடப்பட்டு இருந்தது.

நன்ரி:தினமலர்