ஏழு நிமிடத்தில் முடிந்தது தீபாவளி ரயில் முன்பதிவு: ஏமாற்றத்துடன் திரும்பினர் பயணிகள்

by **ராகவா** Tue 3 Sep 2013 - 15:48

சென்னை : முன்பதிவு துவங்கிய, ஏழு நிமிடங்களில் தீபாவளி முன்பதிவுக்கான ரயில் டிக்கெட்டுகள் காலியானதால், பயணிகள் ஏமாற்றத்துடன் திரும்பினர். நவ. 1ம் தேதிக்கான முன்பதிவு இன்று துவங்குகிறது.

தமிழகத்தின் பல்வேறு மாவட்டங்களிலிருந்தும், வடமாநிலங்களிலிருந்தும் வேலைக்காக வந்து, அதிகம் பேர் சென்னையில் வசித்து வருகின்றனர். பண்டிகை காலங்களில் சொந்த ஊர்களுக்குச் செல்வது வழக்கம். இந்தாண்டுக்கான தீபாவளி, நவ., 2ம் தேதி கொண்டாடப்பட உள்ளது. 60 நாட்களுக்கு முன், ரயில்வே முன்பதிவு செய்யலாம் என்பதால், அக். 30ம் தேதிக்கான முன்பதிவு நேற்று துவங்கியது. 10 நிமிடங்களில் டிக்கெட்டுகள் விற்றுத் தீர்ந்தன.இந்த நிலையில், அக். 31ம் தேதி செல்வதற்கான முன்பதிவு நேற்று துவங்கியது. சென்னையில், எழும்பூர், சென்ட்ரல், கடற்கரை உள்ளிட்ட, பல ரயில் நிலையங்களில் முன்பதிவு நடந்தது. தென் மாவட்டங்களுக்குச் செல்லும், கன்னியாகுமரி, நெல்லை, அனந்தபுரி, முத்துநகர், பாண்டியன், பொதிகை உள்ளிட்ட, ரயில்களுக்கான டிக்கெட்டுகள் அனைத்தும், ஏழு நிமிடங்களில் விற்றுத் தீர்ந்தன.

காத்திருப்போர் பட்டியல் நிலைக்குச் சென்றது. இதனால் ஏராளமான பயணிகள் ஏமாற்றத்துடன் திரும்பிச் சென்றனர். டிக்கெட் முன்பதிவுகள், இணையத்தளம் வாயிலாக அதிக அளவில், முன்பதிவு செய்யப்பட்டதால், ஏழு நிமிடத்தில் டிக்கெட்டுகள் காலியானதாக கூறப்படுகிறது.தீபாவளி பண்டிகைக்கு முந்தைய நாளான, நவ., 1ம் தேதி செல்வதற்கான முன்பதிவு இன்று துவங்குகிறது. இதிலாவது டிக்கெட் பெற பலர் இரவுகளில் முன் பதிவு மையங்களில் காத்திருந்தனர்.
நன்றி:தினமலர்