சிரிய அமைதி மாநாடு தாமதம்: திகதி நிர்ணயிப்பதில் இழுபறி

சிரிய அமைதி மாநாடு தாமதம்: திகதி நிர்ணயிப்பதில் இழுபறி
இம்மாத இறுதியில் ஜெனீவாவில் நடத்தத் திட்டமிட்டிருந்த சிரிய அமைதி மாநாடு ஒத்திப்போடப்பட்டதாக ஐ. நா. மற்றும் அரபு லீக்கின் சிரியாவுக்கான விசேட தூதுவர் லக்தர் ப்ராஹிமி அறிவித்துள்ளார். எனினும் இந்த மாநாட்டை ஆண்டு இறுதிக்குள் நடத்த முயற்சிப்பதாக அவர் உறுதி அளித்தார்.

கடந்த செவ்வாய்க்கிழமை சிரேஷ்ட இராஜ தந்திரிகளுடனான பேச்சுவார்த்தை யில் அமைதி மாநாட்டுக்கான திகதியை நிர்ணயிக்க முடியாமல் போனதையடுத்தே ப்ராஹிமி இவ்வாறு அறிவித்தார். இந்நிலையில் ப்ராஹிமி மீண்டும் எதிர்வரும் 25ஆம் திகதி அமெரிக்க மற்றும் ரஷ்ய இராஜதந்திரிகளை சந்திக்க திட்டமிட்டுள்ளார்.

“அமைதி மாநாட்டுக்கான திகதியை இன்று நிர்ணயிக்க திட்டமிட்டிருந்தோம். துரதிஷ்டவசமாக அது முடியாமல் போனது. எனினும் இந்த மாத இறுதிக்குள் மாநாட்டை நடத்த முடியும் என நாம் நம்புகிறோம்” என்று சுவிஸ் தலைநகர் ஜெனீவாவில் செவ்வாய்க்கிழமை இராஜதந்திரிகளை சந்தித்தபின் ப்ராஹிமி ஊடகங்களுக்கு குறிப்பிட்டார்.

அதிகாரத்தை கையளிக்கும் பேச்சுவார்த் தைக்கு தாம் தயாரில்லை என ஜனாதிபதி பஷர் அல் அஸாத் அரசு குறிப்பிட்டுள்ளது. இந்த விடயத்தில் எதிர்தரப்பிலும் பிளவு இருப்பதாக ப்ராஹிமி குறிப்பிட்டார். எதிர்த்தரப்பான சிரிய தேசிய கூட்டணியின் தலைவர் அஹ்மட் ஜர்பா, அசாத் வெளியேறுவது குறித்த தெளிவான காலவரையறை நிர்ணயிக்கப் படாமல் தாம் அந்த மாநாட்டில் பங்கேற்பதில்லை என குறிப்பிட்டுள்ளார்.

எனினும் இந்த மாநாட்டில் பங்கேற்பது குறித்து பேச்சவார்த்தை நடத்த எதிர்வரும் சனிக்கிழமை துருக்கி, ஸ்தான்பூல் நகரில் கூடவிருப்பதாக சிரிய தேசிய கூட்டணி குறிப்பிட்டது. ஆனால் அந்த கூட்டணியில் அங்கத்துவம் வகிக்கும் முக்கிய உறுப்பினர்கள் மாநாட்டில் பங்கேற்றால் கூட்டணியில் இருந்து விலகுவதாக எச்சரித்துள்ளனர்.

இந்நிலையில் எதிர்த்தரப்பு பங்கேற்காவிட்டால் ஜெனீவா மாநாடே இல்லை என்று ப்ராஹிமி விபரித்தார். மறுபுறத்தில் சிரிய உள்நாட்டு யுத்தத்தினால் அந்நாட்டு மொத்த சனத்தொகையில் பாதியளவானோருக்கு மானிதாபிமான உதவி தேவைப்படுவதாக ஐ. நா. அறிவித்துள்ளது.

மாநாடு நடந்து தான் என்ன ஆக போக்குதாக்கும்