இங்கிலாந்துடனான தீர்க்கமான 2ஆவது டெஸ்டில் இலங்கை அணி இன்று களத்தில்

by **நண்பன்** Fri 3 Jun 2011 - 10:19

இங்கிலாந்துடனான தீர்க்கமான இரண்டாவது டெஸ்ட் போட்டி லண்டன் லோட்ஸ் மைதானத்தில் இன்று ஆரம்பமாகவுள்ளது. காடிபில் நடந்த இரு நாடுகளுக்கும் இடையிலான முதலாவது டெஸ்ட் போட்டியில் இலங்கை அணி எதிர்பார்க்காத சந்தர்ப்பத்தில் இன்னிங்ஸ் தோல்வியை சந்தித்தது. இந்த நிலையில்தொடர் தோல்வியை தவிர்க்க இலங்கை அணி இன்று ஆரம்பமாகும் டெஸ்டில் தோல்வியைத் தவிர்ப்பது கட்டாயமாகும்.

குறிப்பாக வலுவான துடுப்பாட்ட வரிசையுடன் இங்கிலாந்து சென்றுள்ள இலங்கை அணி இரண்டாவது டெஸ்டில் தமது துடுப்பாட்ட திறமையை வெளிக்காட்டுவது கட்டாயமாகும். குறிப்பாக சிரேஷ்ட வீரர்களான குமார் சங்கக்கார மற்றும் மஹேல ஜயவர்தன, திலான் சமரவீர ஆகியோர் சோபித்தால்தான் இங்கிலாந்துக்கு நெருக்கடி கொடுக்க முடியும். இதில் தரங்க பரணவிதான, அணித்தலைவர் டில்ஷான், பிரசன்ன ஜயவர்தன ஆகியோர் இரண்டாவது டெஸ்டிலும் சோபிக்க வாய்ப்புள்ளது. காடிப் டெஸ்ட்டை இலங்கை அணி சமன் செய்ய அதிக வாய்ப்பு இருந்த நிலையில் கடைசி நாளின் கடைசி பகுதியில் 24.4 ஓவர்களில் வெறும் 82 ஓட்டங்களுக்கு சுருண்டு இன்னிங்ஸ் தோல்வியை சந்தித்தமை குறிப்பிடத்தக்கது.

இந்நிலையில் முதல் டெஸ்டில் வலுவற்ற பந்துவீச்சு வரிசையுடன் களமிறங்கிய இலங்கை அணியில் இரண்டாவது டெஸ்டில் மாற்றம் இருக்கலாம். குறிப்பாக காயம் காரணமாக முதல் டெஸ்டில் விளையாடாத தில்ஹார பெர்னாண்டோ இரண்டாவது டெஸ்டில் கிளமிறங்குவார் என எதிர்பார்க்கப்படுகிறது. அத்துடன் சுழல் பந்துவீச்சிலும் மாற்றங்கள் இருக்காது என எதிர்பார்க்கப்படுகிறது. மறுபுறத்தில் இங்கிலாந்து அணி முதல் டெஸ்டில் விளையாடிய அதே வலுவான அணியுடனேயே இன்றும் களமிறங்கும். ஒரே ஒரு மாற்றமாக காயத்திற்கு உள்ளாகியுள்ள ஜேம்ஸ் அன்டர்ஸனுக்கு பதில் ஸ்டிபன் பின் இரண்டாவது டெஸ்டில் களமிறங்க வாய்ப்பு உள்ளது.

இங்கிலாந்து அணி கடைசியாக விளையாடிய மூன்று டெஸ்ட் போட்டிகளிலும் இன்னிங்ஸால் வெற்றியீட்டியுள்ளதோடு அந்த அணி லோட்ஸில் கடந்த 5 ஆண்டுகளில் தோல்வியை சந்தித்ததில்லை என்பது குறிப்பிடத்தக்கது. அதேபோன்று லோட்ஸில் இலங்கை அணி கடைசியாக 2006 ஆம் ஆண்டு டெஸ்ட் போட்டியில் விளையாடியது. அந்த டெஸ்டில் பலோ ஓன் செய்த இலங்கை இரண்டாவது இன்னிங்ஸில் 199 ஓவர்கள் முகம்கொடுத்து போட்டியை சமன் செய்தது.