உலகின் மிகவும் வயதான உடல் கட்டழகி

உலகின் மிகவும் வயதான உடல் கட்டழகியாக அமெரிக்காவைச் சேர்ந்த எர்னெஸ்ரின் ஷெப்பேர்ட் என்ற 74 வயது பாட்டி கின்னஸ் உலக சாதனைப் புத்தகத்தில் இடம்பிடித்துள்ளார்.

வயதான காலத்திலும் கட்டுடல் பெற்று ஆரோக்கியமாக திகழும் எர்னெஸ்ரின் "வாஷிங்டன் போஸ்ட்' பத்திரிகைக்கு அளித்த பேட்டியில், ""வயது என்பது ஒரு பொருட்டல்ல. அது வெறும் எண்ணாகும்'' என்று தெரிவித்தார்.

அவரது கட்டுடலால் கவரப்பட்டு அவரைச் சுற்றி வரும் இளைஞர்களிடமிருந்து தப்பித்துக் கொள்ள எர்னெஸ்ரின் போராட வேண்டியுள்ளதாக அவரது கணவர் கொலின் ஷெப்பேர்ட் தெரிவித்தார்.

எர்னெஸ்ரினுக்கும் கொலினுக்கும் திருமணமாகி 54 வருடங்களாகிறது. அவர்களுக்கு 53 வயதில் ஒரு மகனும் 14 வயதில் ஒரு பேரனும் உள்ளனர். தனது உடலை கட்டுக்கோப்பாக பேண தான் பின்பற்றும் வழி முறைகள் குறித்து எர்னெஸ்ரின் விபரிக்கையில், தான் தினசரி உடலை வலுப்படுத்தும் உடற்பயிற்சிகளை செய்து வருவதாக கூறினார்.

தினசரி அதிகாலை 3.00 மணிக்கு விழித்தெழும் எர்னெஸ்ரின் தவறாது தியானம் செய்வதுடன் உள்ளூர் பூங்காவொன்றில் மதிய உணவுக்கு முன் 10 மைல்கள் தூரம் ஓடுவதையும் வழக்கமாகக் கொண்டுள்ளார். அத்துடன் அவர் தினசரி தவிட்டு அரிசிச் சோறு, கோழியின் மார்பு இறைச்சி, மரக்கறி வகைகள் என்பவற்றை உண்டு வருவதுடன் ஒரு கிண்ணம் முட்டை வெள்ளைக்கருவையும் அருந்தி வருகிறார்.

கடந்த 18 வருட காலப் பகுதியில் எர்னெஸ்ரின் 9 மரதன் ஓட்டப் போட்டிகளில் பங்கேற்றதுடன் இரு கட்டழகி போட்டிகளில் வெற்றி பெற்றுள்ளார்.

அவர் கட்டழகி பயிற்சிகளை போதிக்கும் வகுப்புக்களை நீண்ட காலம் நடத்தி வருகிறார்.

உடல் கட்டுக்கோப்பை பேண சிறுவயது முதலே பயிற்சிகள் பெற வேண்டும் என்ற கருத்தையும் எர்னெஸ்ரின் பொய்யாக்கியுள்ளமை குறிப்பிடத்தக்கது. மரவேலை செய்பவர் ஒருவருக்கும் பாடசாலை ஆசிரியை ஒருவருக்கும் மகளாகப் பிறந்த எர்னெஸ்ரினுக்கு 56 வயதின் பின்னரே உடலை கட்டுக்கோப்பாக பேண வேண்டும் என்ற ஆர்வம் ஏற்பட்டது.

எர்னெஸ்ரினும் அவரது சகோதரி மைல்ட் ரெட்டும் வயதாக வயதாக தமது தோல் மென்மை நிலையை அடைந்து வருவதை உணர்ந்தனர். அவர்கள் தமது உடலை இறுக்கும் முகமாக பயிற்சிகளில் ஈடுபட ஆரம்பித்தனர். இந்நிலையில் மைல்ட்ரெட் இருதய குருதிக் குழாய் திடீரென வீக்கமடைந்த நிலையில் மரணத்தை தழுவினார்.

இதனையடுத்து அளவுக்கதிகமான உடல் கட்டுறுதி பயிற்சிகளை மேற்கொள்வதால் எர்னெஸ்ரின் தனது மரணத்தை தானே விரைவில் தேடிக் கொள்ள முயற்சிப்பதாக பலரும் அவரை எச்சரிக்க ஆரம்பித்தனர். எனினும் எர்னெஸ்ரின் தனது உடலை கட்டுறுதியாக்கும் பயிற்சிகளை தொடர்ந்தார்.

இது தொடர்பில் அவர் விபரிக்கையில், "நாங்கள் அனைவருமே ஒரு நாள் மரணமடையப் போகிறோம். ஆனால் நாம் வாழும் போது சரியானபடி வாழவேண்டும்'' என்று கூறினார்

புதிய தகவல் பகிர்விற்க்கு நன்றி தோழரே