இலங்கை கிரிக்கெட் சபைக்கு ஐ. சி. சி. எச்சரிக்கை கடிதம்

மோசமான காலி ஆடுகளம்

இலங்கை கிரிக்கெட் சபைக்கு
ஐ. சி. சி. எச்சரிக்கை கடிதம்


அண்மையில் நடந்த இலங்கை - அவுஸ்திரேலிய அணிகளுக்கு இடையிலான காலி டெஸ்ட் போட்டியின்
போது மோசமான ஆடுகளத்தை தயாரித்ததாக இலங்கை கிரிக்கெட் சபை மீது ஐ. சி. சி.
உத்தியோகபூர்வ எச்சரிக்கையை விடுத்துள்ளது.
இதன்படி காலி ஆடுகளத்தில் தொடர்ந்து சர்வதேச போட்டிகளை நடத்துவது குறித்து ஐ. சி.
சி. ஆய்வு செய்யவுள்ளது. இதற்காக ஐ. சி. சி. ஆடுகளம் தொடர்பான ஆலோசகர் அன்டி
அட்கின்ஸன் இந்த மாத இறுதியில் இலங்கை வந்து காலி ஆடுகளத்தை ஆய்வு செய்யவுள்ளார்.
இதன்போது மேற்படி ஆடுகளத்தின் திருத்தம் குறித்து இலங்கை கிரிக்கெட் சபைக்கு ஆலோசனை
வழங்கவுள்ளார்.
அதேபோல் ஆடுகளத்தை ஆய்வுசெய்யும் அட்கின்ஸன் மைதானம் குறித்து ஐ. சி. சி. யிடமும்
அறிக்கை சமர்ப்பிக்கவுள்ளார். இதில் தேவையான நடவடிக்கைகளை ஐ. சி. சி.க்கு கோருவார்.
இதில் காலி ஆடுகளத்தில் அடுத்த சர்வதேச போட்டி நடத்த வேண்டிய காலப் பிரிவு
குறித்தும் ஐ. சி. சி. யிடம் கோரிக்கை விடுக்கவும் வாய்ப்பு உள்ளது.
கடந்த ஆகஸ்ட் 31 ஆம் திகதியில் இருந்து செப்டெம்பர் 3 ஆம் திகதிவரை காலியில் நடந்த
இலங்கை - அவுஸ்திரேலிய அணிகளுக்கு இடையிலான டெஸ்ட் போட்டியில் இரு அணிகளும்
துடுப்பெடுத்தாட தடுமாறின. இதில் இலங்கை அணி முதல் இன்னிங்ஸில் 105 ஓட்டங்களுக்கே
சுருண்டதோடு நான்கு நாட்களில் முடிந்த இந்த போட்டியை ஆஸி. அணி 125 ஓட்டங்களால்
இலகுவாக வென்றது.
இந்த போட்டியில் மத்தியஸ்தராக செயல்பட்ட கிறிஸ் பிரோட் ஆடுகளம் குறித்து அதிருப்தி
தெரிவித்த தோடு ஐ. சி. சியிடமும் அறிக்கை சமர்ப்பித்தார். இந்நிலையில் இந்த விவகாரம்
குறித்து ஐ. சி. சி. தலைமை போட்டி மத்தியஸ்தர் ரன்ஜன் மடுகல்ல மற்றும் அதிகாரிகள்
ஆய்வு நடத்தினர். இதன்போது போட்டியின் வீடியோ ஆதாரங்களை பார்வையிட்ட பின்னரே இந்த
விவகாரம் குறித்து ஐ. சி. சி. இலங்கை கிரிக்கெட் சபையை எச்சரித்துள்ளது.
முன்னதாக கடந்த 2010 ஆம் ஆண்டு இலங்கை - இந்திய ஒருநாள் போட்டிக்கு மோசமான ஆடுகளத்தை
தயாரித்த டெல்லி, பெரோஸ் ஷா கொட்லா மைதானத்திற்கு ஐ. சி. சி. ஓர் ஆண்டு போட்டித் தடை
விதித்தமை குறிப்பிடத்தக்கது.