ஐநா நிபுணர்குழு அறிக்கையின் சமகால நிலவரம் - ஆய்வு

by **veel** Wed 25 May 2011 - 23:14

ஐநா நிபுணர்குழு அறிக்கையின் சமகால நிலவரம் - ஆய்வு
நீதி என்பது காலதாமதம் இல்லாமல் வழங்கினால் தான் பயனுள்ளதாக இருக்கும். இழுபறிப்பட்டுக் கால வரையின்றிச் செல்லும் நீதி நடவடிக்கை எதிர்பார்த்த பயனைத்தருவதில்லை. இழுபறிப்பட்ட நீதி நீதியல்ல என்று சொல்வதில் அர்த்தமிருக்கிறது.

இலங்கை போர்க் குற்றங்கள் தொடர்பாக ஐநா நிபுணர்குழு அறிக்கை 2011 மார்ச் 31ம் நாள் வெளிவந்தது. ஐநா பாதுகாப்புச்சபை எடுக்கும் முடிவில் அடுத்த கட்ட நடவடிக்கை தங்கியிருக்கிறது. இது செயலாளர் நாயகத்தின் வாக்குமூலம்.

எனது கடமை முடிந்துவிட்டது. இதற்கு மேல் என்னால ஒன்றும் செய்ய முடியாது என்பதைப்போல் பான் கீ மூனின் பேச்சும் நடவடிக்கைகளும் இருக்கின்றன. அவர் அறிக்கை தொடர்பாக பாதுகாப்புச் சபை உறுப்பு நாடுகளை இதுவரை சந்திக்கவில்லை.

லிபியாப் பிரச்சனை பான் கீ மூனின் கவனத்தை ஈர்த்துள்ளது. மனிதாபிமான நெருக்கடி லிபியாவில் மோசமடைந்து வருகிறது என்று பான் கீ மூன் அறிக்கை வெளியிட்டுள்ளார். தன்னுடைய சிறப்புத் தூதர் அப்துல்லா அல்- கதிப் லிபியாவுக்கு அனுப்பப்பட்டுள்ளதாகவும் அவர் அதே அறிக்கையில் கூறியுள்ளார்.

இலங்கையில் போர் நெருக்கடி உச்சம் அடைந்த போது தனது முதன்மை அலுவலர் நம்பியாரை அவர் இலங்கைக்கு அனுப்பினார். பான் கீ மூனின் நம்பகத்தன்மையை நம்பியாரின் பயணம் பெரிதும் பாதித்துள்ளது ஏனென்றால் கேரள மாநிலத்தைச் சேர்ந்த நம்பியார் ஆளுங்காங்கிரஸ் கட்சியுடன் நெருக்கமானவர்.

நம்பியாரின் பயணம் இன்று வரை பல சந்தேகங்களைக் கிளப்புகின்றன. பெரும்பாலும் இந்திய மத்திய அரசின் குரலாகச் செயற்படும் நம்பியார் ஐநாவின் நடு நிலைக்குக் குந்தகம் விளைவிப்பார்.

நிரந்தர உறுப்புரிமை வகிக்கும் ஐநா பாதுகாப்புச் சபை நாடுகளில் ஒன்றாவது நிபுணர்குழு அறிக்கையில் குற்றஞ் சாட்டப்பட்டவர்களை சர்வதேச குற்றவியல் நீதி மன்றத்தில் நிறுத்துவது பற்றி இது வரையில் வெளிப்படையாகப் பேசவில்லை.

மாறாக ருஷ்யா அறிக்கையைத் தரக்குறைவாக விமர்சித்துள்ளது இது ஐநா அறிக்கையல்ல அது செயலாளர் நாயகம் நியமித்த குழுவினர் அறிக்கை என்று ருஷ்யா விதண்டாவாதம் புரிகிறது. இந்த அறிக்கை எந்தச் சபையில் சமர்ப்பிக்கப்பட்டாலும் அதை வன்மையாக எதிர்ப்போம் என்கிறது ருஷ்யா.

இலங்கை உள்விவகாரங்களில் தலையிட வேண்டாம் என்று சீனா உலக நாடுகளைக் குறிப்பாக அமெரிக்காவை எச்சரித்துள்ளது அமெரிக்கா பாலுக்கும் தோழன் பூனைக்கும் தோழன் என்று இரட்டை வேடம் போடுகிறது. அதனுடைய பங்காளன் இந்தியா தமிழ் நாடு என்று தேர்தல் முடிவுகளினால் அடக்கி வாசிக்க வேண்டிய நிலையில் இருக்கிறது. என்றாலும் இலங்கை வெளிவிவகார அமைச்சர் பீரிஸ் தமிழ் நாடு தேர்தல் முடிந்த பிறகு புது டில்லி சென்ற போது சிறந்த முறையில் வரவேற்கப்பட்டார்.

அறிக்கை தொடர்பாக ஏதேனும் ஆக்கபூர்வமான தொடர் முன்னெடுப்புக்கள் இருக்குமா என்று கேட்கும் அன்பர்களுக்கு ஆறுதல் தரக்கூடிய தகவல் எம்மிடம் இல்லை. ஈழத்தமிழர் விவகாரம் இழுபறி நிலையில் இருப்பதை மாத்திரம் எம்மால் உறுதி செய்ய முடியும்.