மகளுக்காக கருப்பையை தானம் செய்த தாய்

சிறுநீரகம், கல்லீரல், இதய மாற்று அறுவை சிகிச்சைகள் பரவலாக நடப்பது தான். மருத்துவ உலகின் சாதனையாக தாயின் கருப்பை மகளுக்கு பொருத்தப்பட உள்ளது. தான் வளர்ந்த கருப்பையிலேயே தனது குழந்தையையும் சுமக்க இருக்கிறார் இங்கிலாந்தை சேர்ந்த இளம்பெண். இங்கிலாந்தை சேர்ந்தவர் சாரா(25). ஸ்வீடன் தலைநகர் ஸ்டாக்ஹோமில் வேலை பார்த்து வருகிறார். இவர் மேயர் ரோகிடன்ஸ்கி சிண்ட்ரோம் என்ற நோயால் பாதிக்கப்பட்டவர்.

கருப்பை இல்லாமல் பிறந்தவர். அவரது உடம்பில் சில பிரச்சனைகள் இருப்பதால் குழந்தை பெறுவதற்கான வாய்ப்பு இல்லை. இதனையடுத்து சாராவுக்கு தனது கருப்பையை வழங்க முன்வந்திருக்கிறார் அவரது அம்மா இவா ஒட்டோசன்(56). முதல்கட்ட பரிசோதனைகள் முடிந்துவிட்டன. ஸ்வீடனின் கோதன்பர்க் நகரில் விரைவில் கருப்பை மாற்று ஓபரேஷன் நடக்க உள்ளது. இதுபற்றி ஓபரேஷன் குழுவின் தலைமை டாக்டர் மேட்ஸ் ப்ரான்ஸ்ட்ராம் கூறுகையில்,"கருப்பை இல்லாமல் பிறந்த சாராவுக்கு அவரது தாயின் கருப்பையே பொருத்தப்பட உள்ளது. தாயின் கருப்பையை மகளுக்கு பொருத்துவது உலகில் இதுதான் முதன் முறை.

ஓபரேஷன் வெற்றிகரமாக முடிந்த பிறகு சாரா கருத்தரிப்பதற்கான சிகிச்சைகள் தொடங்கப்படும். அவரது கருமுட்டைகளே கரு உருவாக்கத்துக்கு பயன்படுத்தப்படும்" என்றார். சாராவின் அம்மா ஒட்டோசன் கூறும் போது,"மகள் எப்போதும் மகிழ்ச்சியாக இருக்க வேண்டும் என்று விரும்புபவள் தான் உண்மையான அம்மா. அவள் குழந்தை பெறுவதற்கு கருப்பையை தருவது மிகுந்த மகிழ்ச்சி அளிக்கிறது.

சாராவை சுமந்த அதே பை தான் என் பேரப் பிள்ளையையும் சுமக்கப் போகிறது" என்றார். சாரா கூறும் போது,"குழந்தை பெற முடியாது என்பது வருத்தமாகத் தான் இருந்தது. பிறகு அம்மா தான் இந்த யோசனையை சொன்னார். முதலில் நான் சம்மதிக்கவில்லை. அவர் விடுவதாக இல்லை. தொடர்ந்து வற்புறுத்தி என்னை சம்மதிக்க வைத்திருக்கிறார். அம்மாவின் உதவியால் நானும் அம்மாவாகப் போகிறேன்" என்றார்.

2000ம் ஆண்டில் சவுதி அரேபியாவில் 26 வயது பெண்ணுக்கு 46 வயது பெண்ணின் கருப்பைப் பொருத்தப்பட்டது. ஆனால் பல்வேறு தொடர் பாதிப்புகளால் 99 நாட்களுக்கு பிறகு அது மீண்டும் அகற்றப்பட்டது குறிப்பிடத்தக்கது.

இந்த செய்தியை படிக்கும் போது என்னமோ பண்ணுது
தாய் பற்றி சிந்திக்கும் போது உலகில் எதுவும் வேண்டாம்
தாய் மடியில் உறங்கணும் போல் உள்ளது அருமை அருமை
என்ன தாய் என்ன பாசம் இறைவா (சுப்ஹானல்லாஹ்)
அந்த தாய்க்கு
:+=+: