வங்காளதேச கட்டிடம் இடிந்ததில் சாவு எண்ணிக்கை 147 ஆக உயர்வு

by *சம்ஸ் Thu 25 Apr 2013 - 8:09

டாக்கா, ஏப். 25-

வங்காளதேச தலைநகர் டாக்காவின் புறநகரான 'சவார்' பகுதியில் ரானா பிளாசா என்ற இடத்தில் 8 மாடி கட்டிடம் இருந்தது. அங்கு ஆயத்த ஆடை தொழிற்சாலைகள் இயங்கி வந்தன. அங்கு சுமார் 2,600-க்கும் மேற்பட்டவர்கள் பணியில் ஈடுபட்டிருந்தனர்.

அப்போது யாரும் எதிர்பாராத வகையில் அந்த கட்டிடம் இடிந்து விழுந்து தரைமட்டமானது. இதனால் இடிபாடுகளில் சிக்கி 90 பேர் பலியாகினர். தகவல் அறிந்ததும் போலீசார் தீயணைப்பு படையினர் உள்ளிட்ட மீட்பு குழுவினர் விரைந்தனர். இடிபாடுகளை அகற்றி காயம் அடைந்தவர்களை மீட்டனர். அப்போது மேலும் பல உடல்கள் கண்டெடுக்கப்பட்டன.

இதுவரை 147 பேரின் பிணங்கள் மீட்கப்பட்டுள்ளன. இடிபாடுகளை அகற்றும் பணி தொடர்ந்து நடைபெற்று வருகிறது. இதுவரை 1000 பேர் காயத்துடன் மீட்கப்பட்டுள்ளனர். இன்னும் நூற்றுக்கணக்கானவர்கள் இடிபாடுகளில் சிக்கி தவிக்கின்றனர். அவர்களை உயிருடன் மீட்கும் பணி நடந்து வருகிறது. எனவே, இடிபாடுகள் அதிவேகமாக அகற்றப்பட்டு வருகின்றன.

இதற்கிடையே இக்கட்டிடம் மிகவும் பழுதடைந்து இடியும் நிலையில் இருந்ததாகவும், தொழிற்சாலையின் மேலாளர் அதை கண்டு கொள்ளாமல் தொடர்ந்து இயக்கியதால்தான் இந்த கோர விபத்து நடந்ததாகவும் தொழிலாளர்கள் தெரிவித்தனர்.

இந்த கட்டிடம் ஆளும் அவாமி லீக் கட்சியின் இளைஞர் அணி தலைவருக்கு சொந்தமானது. அவரும் கட்டிட இடிபாடுகளுக்குள் சிக்கியிருந்தார். பின்னர் அவர் உயிருடன் மீட்கப்பட்டதாக தகவல்கள் வெளியாகி உள்ளன.

ஆயத்த ஆடை தொழிற்சாலைகள் நிறைந்த டாக்காவில் இதுபோன்ற விபத்துகள் அடிக்கடி நடக்கின்றன. கடந்த நவம்பரில் ஒரு தொழிற்சாலையில் தீ பிடித்ததில் 112 பேர் பலியாகினர்.

மாலைமலர்.