ஒசாமாவின் புகைப்படம் வெளியிடப்போவதில்லை : ஒபாமா அதிரடி அறிவிப்பு

by **நேசமுடன் ஹாசிம்** Thu 5 May 2011 - 10:24

ஒசாமா பின் லேடன் கொல்லப்பட்டதை உறுதிப்படுத்தும் புகைப்படங்களை வெளியிடப்போவதில்லை என அமெரிக்க அதிபர் பாரக் ஒபாமா அறிவித்துள்ளார்.

இது தொடர்பில் ஒபாமாவின் வெள்ளை மாளிகை பேச்சாளர் ஜே கார்னேய் நேற்றிரவு அறிவித்தார். சட்ட நிபுணர்களினதும், அரசியல் ஆய்வாளர்களினதும் ஆலோசனைகளின் படி,

எங்களுடைய தேசிய பாதுகாப்பு நடைமுறைகளுக்கு இவ்விடயம் அமைவாக இல்லை. இப்புகைப்படங்கள் வெளியிடப்படுமாயின் அவை அமெரிக்காவுக்கு எதிரான அடையாளமாக (Icon) பிரபலமடைய வாய்ப்பிருக்கிறது என தெரிவிக்கப்படுகிரது.

அத்துடன் ஒசாமா கொல்லப்பட்டதை, புகைப்படங்களை வெளியிட்டு தான் உறுதிப்படுத்த வேண்டுமென்ற தேவை எமக்கில்லை. இதனால் இம்முடிவை அமெரிக்க அதிபர் பாரக் ஒபாமா எடுத்துள்ளதாக அவர் தெரிவித்தார்.

இதேவேளை இந்த அறிவிப்பு வெளியாகி ஒரு சில மணித்தியாலங்களில், பாகிஸ்த்தான் இராணுவத்தினரால் சில முக்கிய புகைப்படங்கள் செய்திதளங்களுக்கு வெளியிடப்பட்டுள்ளன.

ஒசாமா மீதான தாக்குதல் நடந்து முடிந்த ஒரு சில மணிநேரத்தில் எடுக்கப்பட்ட இப்புகைப்படங்கள், அமெரிக்க ஹெலிகாப்டர் பகுதி ஒன்று அங்கிருந்த நீச்சல் தடாகம் அருகே கைவிடப்பட்டிருப்பதும், மூன்று பேர் இரத்த வெள்ளத்துடன் கிடப்பதுமான காட்சிகள் இடம்பெற்றுள்ளன.

எனினும் இவையெதுவும் ஒசாமாவின் சடலத்தை உறுதிப்படுத்தவில்லை என்பது குறிப்பிடத்தக்கது.