நகங்களுக்கு கிரீடம்.

அலங்கார விஷயத்தில் மேற்கத்திய நாட்டவர்களுக்கு அதீத ஆர்வம். பாடி பெயிண்டிங், டாட்டூஸ் என்று விதவிதமாக அலங்கரித்துக் கொள்வார்கள். அதிலும் பலரின் கவனத்தையும் ஈர்க்க விரும்பி வினோதமாக அலங்கரித்துக் கொள்பவர்களும் உண்டு.

அவர்களது அலங்கார மோகத்திற்கு அடையாளம்தான் இந்த `நெய்லிம்பிக்`. அப்படி யென்றால் என்னவென்று யோசிக்க வேண்டாம். நக அலங்காரத்திற்காக நடத்தப்படும் ஒலிம்பிக் போட்டி என்பதால் அப்படி பெயர் சூட்டி இருக்கிறார்கள்.
நகத்திற்கு பாலிஷ் அல்லது மருதாணி பூசிக் கொள்வதுதான் நமக்குத் தெரிந்த நக அலங்காரம். ஆனால் நெய்லிம்பிக் போட்டியைப் பார்த்தால் இப்படி எல்லாமா நகங்களை அலங்காரம் செய்து கொள்ள முடியும் என்ற அதிசயிக்கத் தோன்றுகிறது.

இங்கிலாந்தில் சமீபத்தில் நெய்லிம்பிக் போட்டி நடந்தது. இது 6-வது நெய்லிம்பிக் போட்டியாகும். போட்டியில் 24 நாடுகளைச் சேர்ந்த 354 போட்டியாளர்கள் கலந்து கொண்டனர். வண்ணக் காகிதம், கண்ணாடித்துண்டுகள், கலைப்பொருட்கள், ஜெல் போன் றவற்றால் நகங்களை அலங்கரித்து இருந்தனர். அது அவர்களின் கலைத்திறனையும், கற்பனைத்திறனையும் அற்புதமாக வெளிப்படுத்தியது. பார்வையாளர்களின் கண்ணையும், கருத்தையும் வெகுவாக கவர்ந்தது. சிலர் நகங்களை மட்டுமல்லாமல் வாய், மூக்குகளிலும் அலங்கரித்து பார்வையாளர்களை ஈர்த்தனர்.

போட்டியில் கிறிஸ்டி மெக்கின் என்ற 32 வயதுப் பெண் வெற்றி பெற்றார். இவர் இங்கிலாந்தைச் சேர்ந்தவர். குறுகிய நேரத்தில் அசாத்திய வேகத்தில் அலங்காரம் செய்து அசத்தினார். இவர் 17 வயதிலேயே நக அலங்காரப் படிப்பில் சேர்ந்து முதன்முதலில் நக அலங்கார நிபுணர் என்ற பெருமையைப் பெற்றவர்.

15 ஆண்டுகளாக நக அலங்கார நிறுவனம் நடத்தி வருகிறார். “நான் நகங்களுக்காக வாழுகிறேன். நகங்களையே நேசிக்கிறேன்” என்று வெற்றிப் பூரிப்பில் நெகிழ்கிறார்.