தினகரன் செய்தி எதிரொலி தாம்பரம் மேம்பாலம் விழா இல்லாமல் திறப்பு

தாம்பரம் : தாம்பரம் கிழக்கு&மேற்கு பகுதியை இணைக்கும் மேம்பாலம் பணி முடிந்து திறக்கப்படாமல் இருந்தது. இதுபற்றி தினகரன் நாளிதழில் படத்துடன் செய்தி வெளியானது. இதையடுத்து விழா இல்லாமலே மேம்பாலம் திறக்கப்பட்டது. தாம்பரம் கிழக்கு பகுதி, வேளச்சேரி சாலை மற்றும் மேற்கு தாம்பரம் ஜி.எஸ்.டி சாலை இடையே ரயில்வே கேட் அடிக்கடி மூடப்படுவதால் போக்குவரத்து நெரிசல் ஏற்பட்டு வந்தது.

இதை தவிர்க்க தாம்பரம் கிழக்கு, மேற்கு பகுதிகளை இணைக்கும் வகையில் ரூ.78 கோடியே 84 லட்சம் செலவில் மேம்பாலம் கட்டப்பட்டது. மேம்பாலத்தின், முடிச்சூர், ஜி.எஸ்.டி சாலை பகுதி மட்டும் கடந்த பிப்ரவரியில் திறக்கப்பட்டது. கிழக்கு தாம்பரம், வேளச்சேரி பகுதி மேம்பாலப்பணி முடிந்தும் திறக்கப்படாமல் மூடப்பட்டு இருந்தது. இதனால் பாலம் கட்டியும் ரயில்வே கேட் முன் போக்குவரத்து நெரிசல் தொடர்கதையானது.

இதுபற்றி தினகரன் நாளிதழில் கடந்த 16ம் தேதி படத்துடன் செய்தி வெளியிடப்பட்டது. இதையடுத்து, நேற்று அந்த பாலத்தில் வாழை மரங்கள் தோரணம் கட்டப்பட்டு இருந்து. இதனால் அமைச்சர்கள் யாரும் பங்கேற்று திறப்பு விழா நடத்தப்படும் என எதிர்பார்க்கப்பட்டது. ஆனால் விழா எதுவும் இன்றி பாலத்தில் இருந்த அடைப்புகள் அகற்றப்பட்டன. வாகனங்கள் அந்த பாலத்தின் வழியாக செல்ல அனுமதிக்கப்பட்டது. இதனால் வாகன ஓட்டிகள் மகிழ்ச்சி அடைந்துள்ளனர். அப்பகுதியில் போக்குவரத்து நெரிசலும் தீர்ந்தது.