மரண தண்டனை, ஆயுள் தண்டனையாக

தூக்கு தண்டனையை குறைக்கும் அதிகாரம் முதல்வருக்கு இல்லை என யாரோ சொல்வதை கேட்டு காலம் கடத்தாமல்,

ராஜீவ் வழக்கில் குற்றம் சாட்டப்பட்ட மூவரின் உயிர்களை காப்பற்ற முதல்வர் ஜெயலலிதா முன்வரவேண்டும் என தி.மு.க., தலைவர் கருணாநிதி கூறியுள்ளார். முன்னர் தனது ஆட்சிக்காலத்தில், தூக்குத்தண்டனை விதிக்கப்பட்ட தீர்ப்புக்களை ஆயுள் தண்டனையாக தான் குறைத்ததாகவும் அவர் சுட்டிக்காட்டியுள்ளார்.

இதுகுறித்து, அவர் நேற்று வெளியிட்ட அறிக்கை:

அரசியல் அமைப்புச் சட்டம் 161வது பிரிவின் படி, மரண தண்டனையை நிறுத்தி வைக்கும் அதிகாரம், மாநில முதல்வருக்கு உண்டு என, தூக்குத் தண்டனை கைதிகளுக்காக சென்னை ஐகோர்ட்டில் வாதாடிய வழக்கறிஞர் காலின் கன்சால்வஸ் கூறியிருக்கிறார். தமிழ்த் தேசிய விடுதலை இயக்கத்தின் பொதுச் செயலராக இருக்கும் தியாகுவுக்கு, கொலை வழக்கு ஒன்றில், 1972ம் ஆண்டு சென்னை ஐகோர்ட் தூக்குத் தண்டனை விதித்தது. இந்த தண்டனையை குறைக்குமாறு கவர்னருக்கு கருணை மனு அனுப்பினார். அதன் மீது, என் தலைமையிலான அமைச்சரவை கூடி, மரண தண்டனையை ஆயுள் தண்டனையாகக் குறைக்கலாம் என பரிந்துரைத்தோம். அதன்படி, தியாகுவுக்கு விதிக்கப்பட்ட மரண தண்டனை, ஆயுள் தண்டனையாகக் குறைக்கப்பட்டது.

இதேபோல், மார்க்சிஸ்ட் - லெனினிஸ்ட் இயக்கத்தின் மாநிலச் செயலராக இருந்த கலியபெருமாள் என்பவருக்கு, கொலை வழக்கு ஒன்றில் தூக்குத் தண்டனை விதிக்கப்பட்டது. இந்த தண்டனையைக் குறைக்க வேண்டும் என, ஒரு லட்சம் பேரிடம் கையெழுத்து பெற்று கவர்னருக்கு அனுப்பினர். இம்மனு மீது, என் தலைமையிலான அமைச்சரவை 1974ல் கூடி, தூக்குத் தண்டனையை ஆயுள் தண்டனையாகக் குறைக்கலாம் என பரிந்துரைத்தது. அதையேற்று, கலியபெருமாளுக்கு விதிக்கப்பட தண்டனை ஆயுள் தண்டனையாகக் குறைக்கப்பட்டது.

எனவே, தூக்குத் தண்டனையை குறைக்கும் அதிகாரம் முதல்வருக்கு இல்லை என, யாரோ சொல்வதைக் கேட்டு காலம் கடத்தாமல், பேரறிவாளன், சாந்தன், முருகன் ஆகியோரின் உயிர்களை காப்பாற்ற, முதல்வர் ஜெயலலிதா முன்வர வேண்டும் என தெரிவித்துள்ளார்