இறந்த மகளின் இதயத்துடிப்பை கேட்டு நெகிழும் தாய்

by **நேசமுடன் ஹாசிம்** Sat 12 May 2012 - 5:57

அமெரிக்காவில் இண்டியானா பகுதியைச் சேர்ந்தவர் காரா மெல்லிக். இப்பெண்ணுக்கு கர்லி என்ற 9 மாத பெண் குழந்தை இருந்தது.
அதை தன் காதலனிடம் ஒப்படைத்து விட்டு அவர் வேலைக்குச் சென்று விட்டார். ஆனால் அக்குழந்தை அடிக்கடி அழுததை பொறுக்க முடியாமல், அந்த கொடூர மனிதன் குழந்தையை தரையில் தூக்கி அடித்தான். இதில் தலையில் பலத்த காயம் அடைந்த கர்லி மூளைச்சாவு அடைந்தது.

அதே சமயத்தில் இதயக் கோளாறால் மரணத்தை நெருங்கிக் கொண்டிருந்த பாரிஸ் சமரா என்ற 11 மாத ஆண் குழந்தைக்கு கர்லியின் இதயத்தை காரா மெல்லிக் தானமாக வழங்கினார்.

இதய மாற்று அறுவை சிகிச்சை வெற்றிகரமாக நடைபெற்று, பாரிஸ் சமரா உயிர் பிழைத்தான். இப்போது அவனுக்கு 3 வயது.

சிகாகோவில் பெற்றோருடன் இருக்கும் அவனை, இண்டியானாவில் இருந்து காரா மெல்லிக் அடிக்கடி சென்று பார்த்து வருகிறார்.

தன் மகளின் இதயத்தால் வாழ்ந்து வரும் பாரா சமராவின் மார்பில் ஸ்டெதஸ்கோப்பை வைத்து அவனது இதயத்துடிப்பை கேட்டு நெகிழ்ந்து வருகிறார்.

அந்த இதயத்துடிப்பில் தன் மகள் இன்னும் உயிருடன் இருப்பது போல உணர்வதாக அவர் கூறுகிறார். இந்த உணர்ச்சிகரமான சந்திப்பை பாரா சமராவின் தாய் சாம் நன்றிப்பெருக்குடன் பார்த்து வருகிறார்.