அமெரிக்கா செல்லும் இந்திய டாக்டர்களுக்கு புதிய கட்டுப்பாடு

புதுடெல்லி, மார்ச். 26-

இந்தியாவில் எம்.பி. பி.எஸ். படித்து பட்டம் பெறும் டாக்டர்கள் அமெரிக்கா போன்ற வெளிநாடுகளுக்கு மேல் படிப்பு படிக்க செல்கிறார்கள். அவர்களுக்கு அங்கு வேலை வாய்ப்பு கிடைப்பதால் வெளிநாட்டிலேயே தங்கி விடுகிறார்கள். இந்தியா டாக்டர்களை உருவாக்குகிறது. அதன் பலனை வெளிநாடுகள் அனுபவிக்கும் நிலை ஏற்பட்டுள்ளது. இதனால் உள் நாட்டில் டாக்டர்கள் பற்றாக்குறை நிலவுகிறது.

கடந்த 3 ஆண்டுகளில் மேல் படிப்புக்காக வெளிநாடு சென்ற இந்திய டாக்டர்கள் 3 ஆயிரம் பேர் நாடு திரும்பவில்லை. வெளிநாடுகளிலேயே தங்கி பணி புரிந்து வருவதாக மத்திய சுகாதாரத்துறை அமைச்சகம் தகவல் தெரிவிக்கிறது. இதனால் மத்திய அரசு கவலை அடைந்துள்ளது. இதை தடுக்க மத்திய அரசு புதிய கட்டுப்பாடுகளையும் வழிகாட்டும் நெறிமுறைகளையும் கொண்டு வர முடிவு செய்துள்ளது.

அதன்படி மேல் படிப்பு படிக்க வெளிநாடு செல்லும் டாக்டர்கள், அவர்கள் ரூ.5 லட்சம் பாண்டுடன் இரு நபர் ஜாமீன் வழங்க வேண்டும், அதில் ஒருவர் டாக்டரின் நெருங்கிய உறவினராகவும் இந்திய குடியுரிமை பெற்றவராகவும் இருக்க வேண்டும். மற்றொருவர் மத்திய அரசு அல்லது மாநில அரசு பணியில் கெஜட்டேட் அந்தஸ்து உடைய அதிகாரி ஒருவர் ஜாமீன் அளிக்க வேண்டும்.

அந்த அதிகாரி 7 ஆண்டுகள் அரசுப் பணியில் பணிபுரிந்து இருக்க வேண்டும். வெளிநாட்டு படிப்புக்கு சென்ற டாக்டர் படிப்பு முடிந்த பின்பு 3 மாதத்துக்குள் இந்தியா திரும்பி வரவில்லை என்றால் ரூ.5 லட்சம் ஜாமீன் பத்திரமும் 12 சதவீத வட்டியும் திரும்ப கிடைக்காது. ரூ.100 மதிப்புள்ள ஜாமீன் பத்திரத்தில் நோட்டரி பப்ளிக் அல்லது சப்-டிவிஷனல் மாஜிஸ்திரேட்டு கையெழுத்து பெற்று ஜாமீன் பத்திரத்துடன் இணைக்க வேண்டும். இவை விரைவில் அமுலுக்கு வருகிறது.

சபாஷ் சரியான முடிவு இந்த முடிவைத்தான் நான் காத்திருந்தேன் யார் வீட்டுக்கோழிய யார் பேர்ல கத்தம் ஓதுவது #+