அரியலூர் அருகே நர்சு போல நடித்து ஆண் குழந்தை கடத்தல்

by *சம்ஸ் Wed May 15, 2013 11:45 am

ஜெயங்கொண்டம், மே.15-
அரியலூர் மாவட்டம் ஜெயங்கொண்டம் அருகே கூவத்தூரைச் சேர்ந்தவர் சுந்தர பாண்டியன் டிரைவர். இவரது மனைவி ராஜகுமாரி (வயது 27) இவர் நிறைமாத கர்பிணியாக இருந்தார். பிரசவ வலி ஏற்பட்டதை தொடர்ந்து ஜெயங்கொண்டம் பஸ் நிலைய ரோட்டில் உள்ள ஒரு தனியார் மருத்துவமனையில் ராஜகுமாரியை சேர்த்தனர்.

அங்கு ராஜகுமாரிக்கு அழகான ஆண்குழந்தை பிறந்தது. அந்த குழந்தையை ராஜகுமாரியின் தாய் தேவகி கவனித்து வந்தர். இந்த நிலையில் நேற்று மாலை அந்த தனியார் மருத்துவமனையில் நர்சு என்று சொல்லி கொண்டு ஒரு பெண் நடமாடினாள். கருப்பு நிறமும், நல்ல உயரத்துடன் இருந்த அந்த பெண் மருத்துவமனையில் குழந்தைகள் வார்டில் நர்சாக பணிபுரிவதாக வார்டில் பலரிடம் கூறினார்.

அப்போது ராஜகுமாரியின் தாய் தேவகியிடம் வந்த அந்த பெண் உங்கள் மகளின் குழந்தைக்கு மஞ்சள் காமாலை உள்ளதாக டாக்டர் கூறியுள்ளார். அதற்கான சிகிச்சை அளிக்க வேண்டும் என்று கூறியதோடு குழந்தையை தூக்கி கொண்டு சென்றார். அப்போது தேவகியையும் தன்னுடன் அழைத்துச் சென்றார்.

மருத்துவமனையில் இருந்து சற்று தூரம் சென்றதும் குழந்தையின் மருத்துவ சீட்டை எடுத்து வந்தீர்களா என்று கேட்டு தேவகியை சீட்டை எடுத்து வர அனுப்பி விட்டார். அதனை நம்பிய தேவகியும் சீட்டை எடுத்து வருவதற்கு வார்டிற்கு சென்றார். பின்னர் திரும்பி வந்து பார்த்த போது குழந்தையையும் அந்த பெண்ணையும் காணவில்லை.

இதனால் பதறி போன தேவகி மருத்துவமனை முழுவதும் உறவினர்களுடன் தேடினார். அப்போது குழந்தை கடத்தப்பட்டது தெரியவந்தது. இது பற்றி சுந்தரபாண்டியன் ஜெயங்கொண்டம் போலீசில் புகார் செய்தார்.

போலீஸ் இன்ஸ்பெக்டர் செந்தில்குமார் வழக்கு பதிவு செய்து விசாரணை நடத்தியதோடு குழந்தையை கடத்திய பெண்ணை தேடி வருகிறார்கள். ஜெயங்கொண்டம் பகுதியில் ஆண் குழந்தையுடன் யாராது பெண் திரிந்தால் 94454 04268 என்ற தொலைபேசி எண்ணில் போலீஸ் இன்ஸ்பெக்டரை தொடர்பு கொள்ளுமாறு அறிவிக்கப்பட்டுள்ளது.