என் வாழ்வில் திருக்குறள்

-
குறள்
–
செய்க பொருளை செறுநர் செறுக்கறுக்கும்
எஃகுஅதனில் கூரியது இல் (759)
–
பொருள்:
–
ஒவ்வொரு மனிதனும் உழைத்து, சம்பாதித்துப் பொருள் சேகரித்துக்
கொள்ள வேண்டும். அப்போதுதான் அவனுக்குப் பகைவர்கள் யாரும்
இருந்தாலும் கூட தீங்கு செய்யத் துணிய மாட்டார்கள்.
அவர்களுடைய கர்வத்தை அடக்குவதற்குச் செல்வத்தைக் காட்டிலும்
தகுந்த ஆயுதம் வேறு ஒன்றும் இல்லை.
-
விளக்கம்:
-
ராமேசுவரத்தில் எப்போது பார்த்தாலும் கடல் அலைகள்
பலவித சங்கீத ராகத்தில் ரீங்காரமிட்டுக்கொண்டே இருக்கும்.
அவ்வூரில் என் தந்தை தச்சர்களுடன் சேர்ந்து ஒரு சிறிய
பயணிகள் படகை உருவாக்கினார். அவர் ஒவ்வொரு நாளும்
உழைத்து அதற்கு வடிவம் கொடுப்பதை அவர்களுடன் கூடவே
இருந்து அதன் வடிவாக்கத்தை அனுபவித்து ரசிப்பேன்.
-
என்னுடைய தொழுகை நேரம் தவிர என்னுடைய முழுக் கவனமும்
அந்தப் படகு உருவாக்கத்தின் மேலேயே இருந்தது. இரண்டு
ஆண்டு கால உழைப்பில் உருவான அந்தப் படகு, தினமும்
30 யாத்திரீகர்களை ராமேசுவரத்தில் இருந்து தனுஷ்கோடிக்கு
ஏற்றிச் செல்லும். பின்னர் அங்கிருந்து திரும்ப அழைத்து வரும்.
இதில் வரும் பணத்தை கொண்டுதான் என் தந்தை என்னைப்
படிப்பதற்கு அனுப்பினார்கள்.
-
உழைப்பின் மூலமாக கிடைக்கும் ஊதியத்தைக் கொண்டுதான்
எதுவும் செய்ய வேண்டும் என்பதில் அவர்கள் உறுதியாக இருந்தார்கள்.
அது மட்டுமல்ல எவரிடமும், எதற்காகவும், எதையும் பரிசாகப் பெறக்
கூடாது என்பதில் என் தந்தை உறுதியாக இருந்தார்.
-
இந்தக் குறள் என் பெற்றோரின் நற்குணத்தை எனக்கு நினைவூட்டுகிறது.
–
————————–
நன்றி- தமிழ் தி இந்து காம்