ஜெயலலிதாவுக்கு மக்கள் பாடம் புகட்டுவார்கள்: நடிகை குஷ்பு

முதல்வர் கருணாநிதியை தனிப்பட்ட முறையில் விமர்சித்து பேசிவரும் ஜெயலலிதா, விஜயகாந்துக்கு தேர்தலில் மக்கள் நல்ல பாடம் புகட்டுவார்கள் என்று நடிகை குஷ்பு பேசினார்.
கடலூர் தொகுதி தி.மு.க வேட்பாளர் இள.புகழேந்தியை ஆதரித்து மஞ்சக்குப்பம் மணிகூண்டு, சீமாட்டி சிக்னல், வண்டிப்பாளையம் நான்குமுனை சாலை, கூத்தப்பாக்கம், பாதிரிகுப்பம் ஆகிய இடங்களில் நடிகை குஷ்பு நேற்று பிரசாரம் செய்தார்.

அதைத் தொடர்ந்து குறிஞ்சிப்பாடி தொகுதி தி.மு.க வேட்பாளரான அமைச்சர் எம்.ஆர்.கே பன்னீர்செல்வத்தை ஆதரித்து கே.என்.சாவடி, திருவந்திபுரம் ஆகிய இடங்களில் பிரசாரம் செய்தார். வழிநெடுகிலும் ஏராளமான பொதுமக்களும், தி.மு.க மற்றும் கூட்டணி கட்சியினரும் திரண்டு குஷ்பு பேச்சை கேட்டனர்.

தி.மு.க வேட்பாளர்களை ஆதரித்து குஷ்பு பேசியதாவது: தேர்தலுக்கு தேர்தல் மட்டுமே சிலர் வெளியே வந்து பொய்களை கூறி வாக்கு கேட்கின்றனர். தேர்தல் முடிந்ததும் மீண்டும் ஓய்வெடுக்க சென்று விடுவார்கள். முதல்வர் கருணாநிதி தான் என்றென்றும் மக்களுக்காக ஓயாது உழைக்கும் தலைவராக இருக்கிறார். மக்களின் நலன்களை சிந்தித்து அவர்களின் வாழ்வில் ஒளியேற்ற பாடுபட்டுக் கொண்டிருக்கிறார்.

தி.மு.கவினரும் கூட்டணி கட்சியினரும் அரசின் சாதனைகளை சொல்லி வாக்கு கேட்கின்றனர். ஆனால் ஜெயலலிதா கூட்டணியை சேர்ந்தவர்கள் எல்லாம் கருணாநிதியை தனிப்பட்ட முறையிலும் நியாயமற்ற முறையிலும் திட்டி விமர்சனம் செய்து வருகிறார்கள். அவர்களின் பொய் பிரசாரங்களை மக்கள் உன்னிப்பாக கவனித்து வருகிறார்கள்.

ஏப்ரல் 13ம் திகதி ஜெயலலிதாவுக்கும் அவரது கூட்டாளிகளுக்கும் மக்கள் தகுந்த பாடம் புகட்டுவார்கள். நாடு போற்றும் நல்ல திட்டங்கள் தொடர தி.மு.க மற்றும் கூட்டணி கட்சிகளை வெற்றி பெறச் செய்ய வேண்டும்.

முதல்வர் கருணாநிதியால் கட்டப்பட்ட புதிய சட்டசபை அழகாக காட்சி அளிக்கிறது. அவர் முதல்வராக சென்றால் தான் அந்த சட்டசபைக்கே பெருமை. அந்த கட்டிடத்துக்கும் சிறப்பு. இவ்வாறு பேசினார்.

:”@: