குழந்தைகளின் எதிர்காலத்தை பாதிக்கும்

எட்டில் இருந்து 15 வயதுக்குட்பட்ட பள்ளிக் குழந்தைகள், சக மாணவர்களை கேலி, கிண்டல் செய்வதற்காக இன்டர்நெட்டை பயன்படுத்தி வருவதாக தகவல் வெளியாகியுள்ளது. இளைய தலைமுறையினர் எதிர்நோக்கியுள்ள இந்த பேராபத்தை தடுத்து நிறுத்த வேண்டும் என்ற கோரிக்கை எழுந்துள்ளது.

டில்லியைச் சேர்ந்த 14 வயது மாணவி சுருதி (பெயர் மாற்றப்பட்டுள்ளது). இந்த மாணவியின் உடல் சற்று பருமனாக இருக்கும். சமீபத்தில் ஒரு நாள், பள்ளி செல்ல மறுத்து பிடிவாதம் பிடித்தாள். பெற்றோர் எவ்வளவோ சமாதானப்படுத்தியும் பயனில்லை. தொடர்ந்து அழுது கொண்டே இருந்தாள். பள்ளி செல்ல மறுப்பதற்கான காரணம் குறித்து மாணவியிடம், பெற்றோர் கேட்டனர். அதற்கு அந்த மாணவி கூறியதை கேட்ட பெற்றோர், அதிர்ந்து போயினர்.

சுருதியுடன் படிக்கும் சக மாணவியர் ஒருங்கிணைந்து, இன்டர்நெட் மூலமாக, சமூக வலை தளத்தில் (சோசியல் நெட் ஒர்க்கிங்) இவளின் உடல் அமைப்பை கடுமையாக விமர்சித்து, கேலி, கிண்டல் செய்துள்ளனர். இதைப் பார்த்து பள்ளியில் உள்ள மற்ற மாணவர்களும் தன்னை கிண்டல் செய்வதாக சுருதி கூறினாள். சுருதி மட்டுமல்ல, சமீப காலமாக டில்லியில் ஏராளமான மாணவர்கள் இதுபோல் பாதிக்கப்பட்டுள்ளனர் என, பிரபல உளவியல் நிபுணர் ஜித்தேந்தர் நாக்பால் கூறியுள்ளார்.

அவர் கூறியதாவது: கம்ப்யூட்டர் பயன்பாடு இளைஞர்களை தாண்டி, தற்போது குழந்தைகளிடமும் ஊடுருவி விட்டது. டில்லியை பொறுத்தவரை பெரும்பாலானோரின் வீட்டில் இன்டர்நெட் பயன்படுத்தும் வசதி உள்ளது. இதை குழந்தைகள் தங்களுக்கு சாதகமாக பயன்படுத்திக் கொள்கின்றனர். பொதுவாக எட்டு முதல் 15 வயதுக்குட்பட்ட குழந்தைகள், புதிதாக ஏதாவது ஒன்றை பார்த்து விட்டால், அதன் மீது அதிக ஆர்வம் செலுத்த துவங்கி விடுவர்.

இன்டர்நெட் பயன்படுத்தும் விஷயமும் இப்படித் தான். பள்ளியில் படிக்கும் மாணவர்கள் சிலர், தங்களுக்குள் ஒருங்கிணைந்து தனித் தனியாக அணி அமைத்து கொள்கின்றனர். இதன் மூலம், இன்டர்நெட்டில் சமூக வலை தளங்கள் மூலமாக, தங்களுக்கு பிடிக்காத சக மாணவர்களை பற்றி, கேலியும், கிண்டலும் கலந்த விமர்சனத்தை தெரிவிக்கின்றனர்.

தங்களின் கோபத்தையும், உணர்ச்சியையும் வெளிப்படுத்துவதற்கு இதை ஒரு பாதுகாப்பான வாய்ப்பாக அவர்கள் கருதத் துவங்கி விட்டது தான் துரதிர்ஷ்டவசமானது. சிலர், சைபர் கபேக்களுக்கும் செல்லத் துவங்கி விட்டனர். குழந்தைகளின் எதிர்காலத்தை பாதிக்கும் இதுபோன்ற பேராபத்தை தடுத்து நிறுத்த வேண்டும். பள்ளியில் கம்ப்யூட்டர் குறித்த கல்வியை கற்றுத் தரும் போதே, அதை எதற்காக பயன்படுத்த வேண்டும் என்பது குறித்த நன்நெறியையும் போதிக்க வேண்டும். இவ்வாறு ஜித்தேந்தர் கூறினார்.