10 ஆயிரம் கோடி ரூபா செலவில் உருவான மாளிகை

by **சாதிகீன்** Thu 13 Jan 2011 - 16:22

உலக கோடீஸ்வரர்களின் பட்டியலில் இடம்பிடித்துள்ள இந்தியரான முகேஷ் அம்பானியை தெரியாதவர்கள் இருக்க முடியாது. அண்மையில் 10 ஆயிரம் கோடி ரூபா (இந்திய ரூபாவில் 4 ஆயிரம் கோடி) செலவில் உலகில் அதிக விலை கூடிய வீடொன்றை இல்லை மாளிகையொன்றை கட்டி அனைவரையும் பிரமிக்க வைத்துள்ளார். தெற்கு மும்பையில் இந்த மாளிகை அமைக்கப்பட்டுள்ளது.

60 மாடி கட்டடத்தின் உயரத்திற்கு நிகராக நிற்கும் இந்த பங்களாவில் 27 மாடிகளே இருக்கின்றன. அந்த அளவுக்கு அதிக உயரத்துடன், பிரமாண்ட அறைகள், பிரமிக்கவைக்கும் வசதிகள் என வார்த்தெடுத்து வடிக்கப்பட்டிருக்கிறது இந்தக் கட்டடம். 4 இலட்சம் சதுர அடியில் வீடு அமைந்துள்ளது.

ஆகாய கோட்டையின் முதல் 6 மாடிகளில் ஆட்கள் தங்குவதில்லை. ஆறு மாடிகளும் கார் நிறுத்துவதற்கான இடமாகும். கோடிக்கணக்கான மதிப்புள்ள கார்களுக்காக, இந்த மாடிகள் ஒதுக்கப்பட்டுள்ளன. இங்கு 168 கார்களை ஒரே நேரத்தில் நிறுத்தி வைக்கலாம்.

7வது மாடியில் பொருட்கள் வைக்கும் களஞ்சிய அறைகள் இருக்கின்றன. இங்கு 9 லிப்ட்டுகள் இருக்கின்றன.

7வது மாடியின் மத்தியில் நடனம் ஆடுவதற்கான பெரிய பால்ரூமும், கலை நிகழ்ச்சி நடத்தும் மேடையும் இருக்கிறது.

நிகழ்ச்சிகளை ஆங்காங்கே இருந்து பார்ப்பதற்கான பெரிய டி.விகள், கலை நிகழ்ச்சிக்கு வருபவர்கள் தங்கும் அறை, அலங்கார அறை, நிகழ்ச்சியை பார்க்க வரும் விருந்தினர்களின் அறை, அவர்களுக்கான பாதுகாவலர்கள் அறை என முழுக்க முழுக்க விருந்தினர் தளமாக காட்சியளிக்கிறது.

7, 8வது மாடியும் விருந்தினருக்கான தளமே! இங்கு ஒரு மினி தியேட்டர் இருக்கிறது. 50 பேர் அமர்ந்து சினிமா பார்க்கலாம். தியேட்டருக்கு மேல் பால்கனியில் பூந்தோட்டம் இருக்கிறது.

9, 10வது மாடியில் நீச்சல் குளம், ஜிம், யோகா அறைகள் இருக்கின்றன. இங்குள்ள அறைகள் குளிர்ச்சியாக இருக்கும் வகையில் விசேஷ வசதிகள் செய்யப்பட்டுள்ளன. இதற்காக ‘ஐஸ் ரூம்கள்’ இங்கு வடிவமைக்கப்பட்டுள்ளன.

இந்த பங்களாவின் 26, 27வது மாடிகளில் ஹெலிகொப்டர்கள் தரை இறங்குவதற்கான வசதியும், கட்டுப்பாட்டு அறைகளும் உள்ளன. 22, 23, 24, 25 ஆகிய மாடிகளில் அம்பானியின் குடும்பத்தினர் தங்குகிறார்கள். இங்குள்ள எல்லா படுக்கை அறைகளில் இருந்தும் அரபிக்கடலில் அலையடிக்கும் காட்சியை ரசிக்க முடியும்.

இந்த ஆகாயக் கோட்டையை அம்பானிக்கு வடிவமைத்துக் கொடுத்தவர்கள் அமெரிக்காவைச் சேர்ந்த பெர்கின்ஸ் அன்ட் வில் நிறுவனத்தினர்.

2007ம் ஆண்டு கட்டடம் கட்டும்பணி தொடங்கியது. அம்பானியும் பல பிரச்சினைகளை எதிர்கொண்டுதான் தன் கனவை நனவாக்கி இருக்கிறார். கனவுக் கோட்டை கட்டி முடிக்கப்பட்டு கடந்த இரு மாதங்களுக்கு முன்பு முகேஷ் அம்பானியின் குடும்பம் இந்த பங்களாவில் குடியேறிவிட்டது.