சுற்றுலா சென்றவர்கள் ஒரே குடும்பத்தை சேர்ந்த 4 பேர் விபத்தில் பலி;5 வயது சிறுமி காயமின்றி தப்பினாள்

by **நண்பன்** Wed 26 Oct 2011 - 8:10

சென்னையில்
மருத்துவ சிகிச்சை பெற வந்த கொல்கத்தைவை சேர்ந்த குடும்பம் புதுச்சேரிக்கு
காரில் சுற்றுலா சென்றனர். திரும்பும் வழியில் காரும்-அரசு பஸ்சும் மோதிய
விபத்தில் ஒரே குடும்பத்தை சேர்ந்த 4 பேரும், கார் டிரைவரும் பலியானார்கள்.
இவர்களுடன் பயணம் செய்த 5 வயது சிறுமி மட்டும் காயமின்றி அதிர்ஷ்டவசமாக
தப்பினாள்.

மேற்கு வங்காள மாநிலம் கொல்கத்தாவை
சேர்ந்த ஒரு குடும்பத்தினர் சென்னை அப்பல்லோ ஆஸ்பத்திரியில் மருத்துவ
சிகிச்சை பெறுவதற்காக வந்தனர். இங்கு சிகிச்சை முடிந்ததும் ஊருக்கு புறப்பட
தயாரானார்கள். அதற்கு முன்பு புதுச்சேரிக்கு சுற்றுலா செல்ல ஆசை
ஏற்பட்டது. இதனை அடுத்து வாடகை காரில் 8 பேர் புதுச்சேரிக்கு சென்று
பல்வேறு இடங்களை சுற்றிப்பார்த்தனர்.

அதன்பிறகு
நேற்று மதியம் அங்கிருந்து காரில் கிழக்கு கடற்கரை சாலை வழியாக சென்னை
நோக்கி வந்து கொண்டிருந்தனர். காரை புதுச்சேரி மாநிலம் காரைக்கால் பகுதியை
சேர்ந்த மாரியப்பன் (வயது 51) என்பவர் ஓட்டி வந்தார். கல்பாக்கம் அடுத்த
காத்தான்கடை சந்திப்பு அருகில் பிற்பகல் 3.15 மணியளவில் கார் வந்து
கொண்டிருந்த போது எதிரே புதுச்சேரி அரசு போக்குவரத்து கழக விரைவு பஸ்
வந்தது. கண் இமைக்கும் நேரத்தில் காரும், அரசு பஸ்சும் நேருக்கு, நேராக
பயங்கரமாக மோதின.

கார் மீது மோதிய பஸ் சாலையோர
சிறிய பாலத்தில் இடித்து நின்றது. இந்த விபத்தில் கார் அப்பளம் போல
நொறுங்கியது. பஸ்சின் முன் பகுதி சேதம் அடைந்தது. விபத்தில் கார் டிரைவர்
மாரியப்பன் மற்றும் அதில் பயணம் செய்த ஒரு பெண், ஒரு ஆண் ஆகிய 3 பேர்
சம்பவ இடத்திலேயே உடல் நசுங்கி பரிதாபமாக இறந்தனர்.

விபத்து
நடந்த இடத்திற்கு மாமல்லபுரம் போலீஸ் துணை சூப்பிரண்டு ஆ.கணேசன்,
கல்பாக்கம் இன்ஸ்பெக்டர் ஜே.சிவகுமார் மற்றும் போலீசார் விரைந்து சென்று
பொதுமக்கள் உதவியுடன் காரின் கதவை உடைத்து விபத்தில் சிக்கியவர்களை
மீட்டனர். படுகாயங்களுடன் கிடந்த 5 பேரை செங்கல்பட்டு அரசு மருத்துவமனைக்கு
அனுப்பி வைத்தனர். ஆனால் வழியிலேயே மற்றொரு பெண்ணும் பரிதாபமாக இறந்தார்.

ஆஸ்பத்திரியில்
அனுமதிக்கப்பட்ட சிறிது நேரத்தில் மேலும் ஒரு ஆண் இறத்தார். இதனால் சாவு
எண்ணிக்கை 5 ஆக உயர்ந்தது. மற்ற 3 பேரும் ஆஸ்பத்திரியில் அனுமதிக்கப்பட்டு
சிகிச்சை பெறுகிறார்கள். விபத்தில் அரசு பஸ் கண்டக்டர் ரவிச்சந்திரன் (51)
என்பவரும் படுகாயம் அடைந்து புதுச்சேரி ஆஸ்பத்திரியில்
அனுமதிக்கப்பட்டுள்ளார். காரில் பயணம் செய்த சுமார் 5 வயது சிறுமி எந்த
வித காயமும் இன்றி அதிர்ஷ்டவசமாக உயிர் தப்பினாள். ஆனால் விபத்து
சம்பவத்தினால் அவள் பெரும் அதிர்ச்சியடைந்து பேச முடியாமல் மிரட்சியுடன்
இருக்கிறாள்.

இதனால் அவளை போலீசார் மாமல்லபுரம்
போலீஸ் நிலையத்திற்கு அழைத்து சென்று தங்களது பாதுகாப்பில் வைத்துள்ளனர்.
மருத்துவ சிகிச்சை பூரணமாக நிறைவு பெற்று ஊருக்கு திரும்பும் நேரத்தில்
சுற்றுலாவுக்காக சென்று ஒரே குடும்பத்தை சேர்ந்த 4 பேர் இந்த கோரவிபத்தில்
சிக்கி பலியாகி விட்டனர். இவர்கள் 4 பேரும் மேற்கு வங்காளத்தை
சேர்ந்தவர்கள் என்பதால் அவர்களது பெயர் விவரம் உடனடியாக தெரியவில்லை. இது
தொடர்பாக கூவத்தூர் போலீசார் விசாரணை நடத்தி வருகின்றனர்.