லிபிய தலைநகர் திரிபோலியில் கிளர்ச்சிப் படைக்கு இடையில் மோதல்

by *சம்ஸ் Mon 12 Dec 2011 - 6:29

இருவருக்கு காயம்; விமான நிலையத்தை கைப்பற்ற முயற்சி
லிபிய தலைநகர் திரிபோலியின் சர்வதேச விமான நிலையத்திற்கு அருகில் கிளர்ச்சிப் படை வீரர்களுக்கு இடையில் மோதல் ஏற்பட்டுள்ளது. இதில் இருவர் காயமடைந்துள்ளனர்.

திரிப்போலி சர்வதேச விமான நிலையத்தை தமது கட்டுப்பாட்டுக்குள் வைத்திருக்கும் கிளர்ச்சிப் படையின் சின்தான் பிரிவுக்கும், திரிபோலியின் கிளர்ச்சிப் படை வீரர்களுக்கும் இடையிலேயே இந்த மோதல் ஏற்பட்டுள்ளது.

இதில் சின்தான் கிளர்ச்சியாளர்களிடம் இருந்து விமான நிலையத்தை கைப்பற்ற திரிபோலி கிளர்ச்சியாளர்கள் முற்பட்டபோதே இந்த மோதல் மூண்டதாக, விமான நிலையத்தின் நிர்வாகப் பிரிவில் பணிபுரியும் கமுகா என்பவர் ஏ. எப். பிக்கு தெரிவித்துள்ளார்.

இது குறித்து சின்தான் படை வீரர் அபூபக்ர் அல் அர்ஷா ஏ. எப். பிக்கு கூறும் போது, விமான நிலையத்திற்கு அருகில் உள்ள சின்தான் படை வீரர்களின் சோதனைச் சாவடிக்கு தேசிய இராணுவத்தின் வீரர்கள் வந்தனர்.

அவர்கள் சோதனைச் சாவடியில் இருக்கும் எமது வீரர்கள் மீது தாக்குதல் நடத்தி விமான நிலையத்தை கைப்பற்ற முயன்றனர் என குறிப்பிட்டார்.

எனினும் இந்த சம்பவம் தனிப்பட்ட மோதலே என லிபிய இராணுவ பேச்சாளர் அந்நாட்டு தொலைக்காட்சிக்கு தெரிவித்துள்ளார்.

இச்சம்பவத்தை தொடர்ந்து முஅம்மர் கடாபியை ஆட்சியில் இருந்து கவிழ்த்த லிபிய இடைக்கால அரசின் ஸ்திரத்தன்மை குறித்து கேள்வி எழுந்துள்ளது. ஏற்கனவே லிபிய தலைநகர் திரிபோலியில் இருந்து வெளிப்பகுதி கிளர்ச்சியாளர்கள் வெளியேறவும், குடியிருப்பாளர்களுக்கு ஆயுதங்களை கையளிக்கவும் இடைக்கால அரசு கெடுவிதித்த நிலையிலேயே இச் சம்பவம் இடம்பெற்றுள்ளது.

இதில் மோதலில் ஈடுபட்ட சின்தான் கிளர்ச்சிப் படையினரின் வசமே லிபிய முன்னாள் தலைவர் முஅம்மர் கடாபியின் மகன் சைப் அல் இஸ்லாம் சிறைவைக்கப்பட்டுள்ளார் என்பது குறிப்பிடத்தக்கது.