பள்ளி மாணவிக்கு தந்தை திருமண "டார்ச்சர்

by *சம்ஸ் Sun 30 Jan 2011 - 6:27

கோவை : திருமணத்துக்கு சம்மதிக்குமாறு பள்ளி மாணவியை அடித்து துன்புறுத்திய தந்தை, பள்ளிச்சீருடை மற்றும் பாடப்புத்தகங்களை பறித்துச் சென்றார். செய்வதறியாது கண்ணீர் விட்டு கதறிய மாணவி, கோவை போலீஸ் கமிஷனரிடம் முறையிட்டு அவற்றை மீட்டார். மாணவியின் வறுமை நிலை கண்ட கமிஷனர், மேற்
படிப்புக்கான நிதி உதவிக்கு ஏற்பாடு செய்தார். கோவை, பீளமேட்டில் வசிக்கும், பிளஸ்2 படிக்கும் மாணவி, நேற்று முன்தினம் போலீஸ் கமிஷனர் சைலேந்திரபாபுவை சந்தித்து தந்தை மீது புகார் செய்தார். "எனது தந்தை பர்னிச்சர் கடையில் வேலை செய்கிறார். அவரால் எங்களது குடும்பத்துக்கு எவ்வித பயனுமில்லை. தினமும் மது குடித்துவிட்டு போதையில் வீட்டுக்கு வரும் அவர், எனது தாயை அடித்து துன்புறுத்துவதையே வாடிக்கையாக கொண்டிருக்கிறார். போதிய வருமானமின்றி வறுமையில் வாடும் எங்களது குடும்பத்தை, 10ம் வகுப்பு படித்த எனது அண்ணன் கூலி வேலைக்குச் சென்று காப்பாற்றுகிறான். "இரு நாட்களுக்கு முன் போதையில் வீட்டுக்கு வந்த தந்தை, எனக்கு திருமணம் செய்து வைப்பது தொடர்பாக தாயிடம் பேசினார். எதிர்ப்பு தெரிவித்த தாயை உருட்டு கட்டையால் தாக்கினார். தடுக்க முயன்றபோது எனது தலையிலும் அடித்தார். அதுமட்டுமின்றி, "படிச்சு நீ கிழிச்சது போதும்' எனக்கூறி எனது பாடபுத்தகங்களையும், பள்ளிச் சீருடைகளையும் பறித்துச் சென்றுவிட்டார். இதன் காரணமாக, என்னால் பள்ளிக்குச் செல்ல முடியவில்லை' எனக்கூறி அழுதார்.
இவரது பிரச்னையை கேட்ட கமிஷனர் சைலேந்திரபாபு, "பீளமேடு போலீசில் இதற்குமுன் முறையிட்டிருக்கிறாயா' என்று கேட்டார். இதற்கு பதிலளித்த மாணவி, " புகார் அளித்தும் பிரச்னை தீர்க்கப்படவில்லை' என்றார். இதையடுத்து, அந்த மாணவியின் வீட்டுக்கே சென்று விசாரித்த கமிஷனர், மாணவியின் குடும்பத்தாரிடமும், பக்கத்து வீட்டாரிடமும் விசாரித்தார். மாணவியின் தந்தையை கண்டுபிடித்து பாடப்புத்தகங்கள் மற்றும் பள்ளிச்சீருடைகளை கைப்பற்றுமாறு போலீசாருக்கு உத்தரவிட்டார். பல இடங்களிலும் விசாரணை நடத்திய போலீசார், மாணவியின் தந்தை பணியாற்றுமிடத்தில் வைக்கப்பட்டிருந்த பாடப்புத்தகங்கள் மற்றும் சீருடைகளை கைப்பற்றி, மாணவியிடம் ஒப்படைத்தனர். கமிஷனர் சைலேந்திரபாபு கூறியதாவது: பள்ளி வயது மகளுக்கு திருமணம் செய்து வைக்க முயன்ற தந்தையின் செயல் சட்டப்படி குற்றம். புகார் கொடுத்தது பள்ளி மாணவி என்றாலும், சாதாரணமாக எடுத்துக்கொள்ளாமல் நடவடிக்கை மேற்கொண்டோம். அந்த மாணவி, நன்கு படித்து, தான் ஆசிரியையாக வேண்டுமென விருப்பம் தெரிவித்தார். எனினும், அதற்கான பொருளாதார வசதி தங்களிடமில்லை என்றும் தெரிவித்தார். எனவே, மாணவியின் மேற்படிப்புக்கான நிதி உதவிக்கு ஏற்பாடு செய்திருக்கிறோம். ஏழை, எளிய மாணவ, மாணவியரின் படிப்புக்கு பல்வேறு உதவிகளை செய்து வரும் "டீம்' என்ற நண்பர்கள் சேவை அமைப்பு, உதவ முன் வந்திருக்கிறது. பெற்றோர், தங்களது பிள்ளைகளின் எதிர்காலத்தை மனதில் கொண்டு, சுயஒழுக்கத்துடன் வாழ்க்கையை அமைத்துக்கொள்ள வேண்டும். சமீபத்தில், என்னை சந்தித்து முறையிட்ட பள்ளி மாணவி ஒருவர், "தந்தையுடன் ஏற்பட்ட தகராறு காரணமாக எனது தாய் வீட்டை விட்டு வெளியேறிவிட்டார். அழைத்து வந்து குடும்பத்துடன் சேர்த்து வையுங்கள்' என கோரிக்கை விடுத்தார். அவரது கோரிக்கை மீதும் உரிய விசாரணை நடத்தப்பட்டு வருகிறது

நன்றி தினமலர்