எகிப்து: மசூதியை சுற்றி வளைத்த ராணுவம் மோர்சியின் ஆதரவாளர்கள் 1000 பேரை கைது செய்தது

by *சம்ஸ் Sat 17 Aug 2013 - 9:55

கெய்ரோ, ஆக. 17-

எகிப்தில் அதிபராக இருந்த மோர்சி, மக்களுக்கு எதிராக செயல்படுகிறார் என்று கூறி ராணுவம் அவரை கடந்த மாதம் ஆட்சியிலிருந்து அகற்றியது. பின்னர் கைது செய்யப்பட்ட அவர் இதுவரை காவலில் வைக்கப்பட்டுள்ளார்.

இதனால், கொதிப்படைந்த அவரது ஆதரவாளர்கள் பல்லாயிரக்கணக்கானோர் மோர்சியை மீண்டும் பதவியில் அமர்த்த கோரி தலைநகர் கெய்ரோவில் ரபா-அல்-அடாவியா என்ற முகாம் அமைத்து போராட்டம் நடத்தி வந்தனர். அவர்களை கலைந்து செல்லும்படி பலமுறை எச்சரிக்கை விடுத்தும் அவர்கள் அதை கண்டுகொள்ளவில்லை.

அதனால் மோர்சியின் ஆதரவாளர்களை அங்கிருந்து அப்புறப்படுத்த போலீசார் கடந்த வியாழன் அன்று காலை களத்தில் இறங்கினர். அப்போது கண்ணீர் புகை குண்டுகளை வீசிய போலீசாருடன் போராட்டக்காரர்கள் மோதலில் ஈடுபட்டனர். பின்னர் அது கலவரமாக மாறியது. போலீசார் துப்பாக்கி சூடு நடத்தி கலவரத்தை கட்டுப்படுத்தினர்.

போராட்டக்காரர்களுக்கும் போலீசாருக்கும் இடையே நடந்த மோதலில் இதுவரை சுமார் ஆயிரம் பேர் கொல்லப்பட்டதாக கூறப்படுகிறது. 10 ஆயிரத்திற்கும் மேற்பட்டோர் படுகாயமடைந்தனர். பலரின் நிலைமை மோசமாக உள்ளதால் இறப்பு எண்ணிக்கை அதிகரிக்கலாம் என அஞ்சப்படுகிறது.

இந்த வன்முறையில் ஆயுதம் ஏந்தியவர்கள் நடத்திய தாக்குதலில் பாதுகாப்பு படையினரும் கொல்லப்பட்டுள்ளது குறிப்பிடத்தக்கது. கெய்ரோ நகரின் பல பகுதிகள் போர்க்களம் போல் காணப்படுகின்றன. துப்பாக்கிச் சூட்டில் இறந்த உறவினர்களின் பிரேதங்களை உறவினர்கள் தேடும் காட்சிகளும், இறந்தவர்களின் மனைவி, பிள்ளைகள் பிணங்களின் மீது விழுந்து கதறி அழும் காட்சிகளும் நெஞ்சை நெகிழச் செய்கிறது.

இதையடுத்து, எகிப்தில் அவசர நிலை பிரகடனம் கொண்டுவரப்பட்டுள்ளது. அரசு அலுவலகங்கள் மீது நடத்தப்படும் தாக்குதலை தடுக்க அரசுப்படைகளுக்கு முழு அதிகாரம் வழங்கப்பட்டுள்ளது.

அங்கு ஏற்பட்ட இந்த ரத்தகளறி குறித்து விவாதிக்க ஐ.நா. சபையின் ரகசிய அவசரக்கூட்டத்திற்கு அழைப்பு விடுக்கப்பட்டுள்ளது. இந்த வன்முறை குறித்து நேர்மையான விசாரணை நடத்த ஐ.நா. மனித உரிமை ஆணையர் நவநீதம் பிள்ளை கேட்டுக்கொண்டுள்ளார்.

இந்நிலையில், தலைநகர் கெய்ரோ அருகே ரம்செஸ் சதுக்கத்தில் உள்ள அல்-பதே மசூதியில் துப்பாக்கிச் சூட்டில் பலியானோர் மற்றும் காயமடைந்தோரை மோர்சியின் ஆதரவாளர்கள் கிடத்தியுள்ளனர். பிரேதங்களின் அருகே உறவினர்கள் அழுது புலம்பிக் கொண்டுள்ளனர்.

இந்த மசூதியை இன்று சுற்றி வளைத்த ராணுவம் உள்ளே இருந்து ஆயிரத்துக்கும் அதிகமான மோர்சியின் ஆதரவாளர்களை கைது செய்தது.

பெண்கள் மற்றும் குழந்தைகள் மட்டும் விரும்பினால் வெளியே சென்று விடலாம் என்று கூறிய ராணுவ வீரர்கள் கைது செய்யப்பட்ட அனைவரையும் மசூதியின் உள்ளேயே அடைத்து வைத்துள்ளது.