அமைச்சர் ஹக்கீமினால் நேற்று சபையில் சமர்ப்பிப்பு

சாட்சிகள், பாதிக்கப்பட்டவர்களை பாதுகாக்க புதிய சட்டமூலம்

அமைச்சர் ஹக்கீமினால் நேற்று சபையில் சமர்ப்பிப்பு




குற்றச்செயல்களால் பாதிக்கப்பட்டவர்களுக்கும், சாட்சிகளுக்கும் பிரதிவாதிகளால் ஏற்படும் அழுத்தங்களிலிருந்து அவர்களைப் பாதுகாப்பதற்கான புதிய சட்டமூலம் நேற்று பாராளுமன்றத்தில் சமர்ப்பிக்கப்பட்டது. புதிய சட்டமூலத்தின் ஊடாக குற்றச் செயல்களால் பாதிக்கப்பட்டவர்களையும், சாட்சிகளையும் பாதுகாக்க நடவடிக்கை எடுக்கப்படும்.

இது தொடர்பான சட்டமூலத்தை நீதியமைச்சர் ரவூப் ஹக்கீம் நேற்று சமர்ப்பித்தார். புதிய சட்டமூலத்தின் பிரகாரம் குற்றச் செயல்களால் பாதிக்கப்பட்டவர்களுக்கும், சாட்சிகளுக்கும் எதிராகச் செயற்படும் நபர்களுக்கு எதிராக மேல்நீதிமன்றத்தில் வழக்குத் தாக்கல் செய்யப்படும். இதில் குற்றவாளியாக்கப்படுபவர்களுக்கு 10 முதல் 12 வருடங்கள் சிறைத் தண்டனை விதிக்கப்படவும் ஏற்றவாறு சட்டம் இயற்றப்பட்டுள்ளது.

இது தவிர 20 ஆயிரம் முதல் 30 ஆயிரம் ரூபாவரை அபராதம் விதிக்கப்பட முடியும். சாட்சிகளையும் குற்றச்செயல்களால் பாதிக்கப்பட்டவர்களையும் பாதுகாப்பதற்காக தேசிய அதிகார சபையொன்றும் ஸ்தாபிக்கப்படவுள்ளது. இதனூடாக சாட்சிகளினதும், குற்றச்செயல்களினால் பாதிக்கப்படுபவர்களினதும் உரிமைகள் அடையாளம் காணப்பட்டு அவற்றைப் பாதுகாக்கவும் இதனை மீறுபவர்களுக்கு எதிராக வழக்குத் தாக்கல் செய்தல், நஷ்டஈடு வழங்குதல், பாதுகாப்பு வழங்குதல், தேவையான சிகிச்சை அளித்தல், புனர்வாழ்வு அளித்தல் என்பனவும் மேற்கொள்ள முடியும்.

இதற்கு மேலதிகமாக பொலிஸ்மா அதிபரின் கீழ் மேற்படி விடயங்களை முன்னெடுப்பதற்காக பாதுகாப்பு பிரிவொன்றும் ஸ்தாபிக்கப்படும். 46 சரத்துகளுடன் கூடிய இந்தச் சட்டமூலம் எதிர்வரும் வாரங்களில் விவாதத்துக்கு எடுக்கப்படவுள்ளது.

தினகரன்

குற்றத்தையும் செய்து விட்டு அதற்குரிய தண்டனையை குற்றவாளீயையே கொடு என  சொல்லும் நிலையில் தான் இலங்கை இன்று இருக்கின்றது.

பிள்ளையையும் கிள்ளி தொட்டிலையும் ஆட்டும் நிலை!